یو این آئی
صنعا//یمن میں حوثی ملیشیا نے تل ابیب کی سمت ایک میزائل داغ دیا ،جس کے نتیجے میں 16 افراد زخمی ہوگئے ۔یمن کے حوثیوں کی جانب سے داغا گیا میزائل جنوبی تل ابیب کے عوامی پارک میں گر کر پھٹ گیا جس کے نتیجے میں 16 افراد زخمی ہوگئے ، اسرائیل کا دفاعی نظام میزائل کو روکنے میں ناکام رہا۔قطر کے نشریاتی ادارے ‘الجزیرہ’ کے مطابق یمن سے داغے گئے ایک میزائل نے رات گئے اسرائیلی شہر تل ابیب کو نشانہ بنایا جس میں کم از کم 16 افراد زخمی ہوئے ۔یمن کے حوثیوں نے تصدیق کی ہے کہ انہوں نے ‘فلسطین ٹو’ نامی ہائپرسونک بیلسٹک میزائل داغا ہے ۔تل ابیب کے طبی حکام نے بتایا کہ میزائل حملے کے بعد 16 افراد معمولی زخمی ہوئے ، جن میں ایک 3 سالہ بچی بھی شامل ہے ، جب کہ 14 افراد کو پناہ گاہوں میں منتقل کرتے ہوئے چوٹیں لگی ہیں، میزائل حملے سے متاثرہ پارک کی فوٹیج میں ایک گڑھا دیکھا گیا ہے ۔میزائل حملے کے نتیجے میں وسطی اسرائیل میں صبح 3 بج کر 44 منٹ پر سائرن بجنے لگے جس کے نتیجے میں لاکھوں افراد اپنے بستروں سے پناہ گاہوں کی طرف بھاگے ۔الجزیرہ کی رپورٹ میں بتایا گیا ہے کہ حوثیوں کے ترجمان یحییٰ سری نے ٹیلی ویژن پر نشر ہونے والی ایک تقریر میں کہا کہ میزائل نے اپنے ہدف کو درست طریقے سے نشانہ بنایا، دفاعی اور انٹرسیپشن سسٹم اسے روکنے میں ناکام رہا۔یحییٰ سری نے کہا کہ ‘یہ حملہ غزہ میں ہمارے بھائیوں کے قتل عام اور ہمارے ملک کے خلاف اسرائیلی جارحیت کا جواب ہے ’۔ادھراسرائیلی فورسز کی جانب سے جاری بیان میں کہا گیا ہے کہ ہم یمن سے حوثیوں کے میزائل حملوں کو روکنے میں ناکام رہے ہیں۔ ایک میزائل کی اطلاع پر سائرن بجائے گئے لیکن اسرائیلی ڈیفنس سسٹم حوثیوں کے میزائلوں کو فضا میں تباہ کرنے میں ناکام رہا۔
