یو این آئی
غزہ //اسرائیلی بمباری سے غزہ کے پناہ گزین کیمپ میں کم از کم 25 فلسطینی جاں بحق ہو گئے ہیں۔ جمعہ کے روز اسرائیلی فوج نے یہ بمباری جبالیہ و دیگر علاقوں میں کی ہے ۔ طبی اہلکاروں کے مطابق جبالیہ میں ایک ہی خاندان کے 10 افراد ایک اسرائیلی بمباری کی وجہ سے جاں بحق ہو گئے ہیں۔ایک ہی گھرانے کے قتل کیے گئے ان 10 فلسطینیوں میں 7 بچے تھے ۔ اس امر کی تصدیق غزہ میں شہری دفاع کے ادارے نے بھی کر دی ہے ۔ شہری دفاع کے ادارے کے مطابق یہ بمباری جبالیہ کے علاقے النازلہ میں کی گئی جو جبالیہ کے جنوب مغرب میں واقع ہے ۔غزہ کی شہری دفاع کی علاقے میں کام کرنے والی ٹیم کے ترجمان محمد باسل کے مطابق اسرائیلی فوج کی بمباری کا ہدف ایک گھر کو بنایا گیا۔ جہاں سات بچوں سمیت دس ہلاک ہو گئے ۔ سات بچوں میں سے سب سے بڑی عمر کا بچہ 6 سال کا تھا۔ ترجمان کے مطابق اسرائیلی بمباری سے 15 فلسطینی زخمی بھی ہوئے ہیں۔غزہ میں اسرائیلی فوج کی بمباری کا یہ سلسلہ اب 15 ماہ مکمل کرنے والا ہے ۔ اگرچہ غزہ میں جنگ بندی کرانے والے اپنی سرگرمیاں جاری رکھے ہوئے ہیں۔ امریکہ کی طرف سے بھی جنگ بندی کے بارے میں دیے گئے بیانات میں پر امیدی ظاہر کی جاتی ہے ۔لیکن جس طرح جنگ بندی کی کوششوں کے کے ان اعلانات کے ساتھ ساتھ امریکہ کی طرف سے سلامتی کونسل میں جنگ بندی قراردادوں کو ویٹو کیے جانے کا سلسلہ جاری ہے اور اسرائیل کو اسلحہ کی سپلائی میں تعطل نہیں اسی طرح اسرائیل بھی مذاکرات میں حصہ لینے کے ساتھ ساتھ غزہ پر بمباری بھی جاری رکھے ہوئے ہے ۔ اب تک اسرائیلی فوج نے جنگ بندی مذاکرات کے اسی شور کے بیچوں بیچ45206 سے زائد فلسطینی قتل کر لیے ہیں۔ ان قتل کیے گئے فلسطینیوں میں 70 فیصد کے لگ بھگ بچے اور خواتین ہیں۔
اسرائیلی آباد کاروں کا مسجد پر دھاوا
یو این آئی
رام اللہ// غزہ کے مقبوضہ مغربی کنارے پر اسرائیلی آبادکاروں نے دھاوا بول دیا جس دوران مسجد کے داخلے دروازے کو بھی آگ لگادی گئی۔غیر ملکی خبر رساں ادارے کے مطابق غزہ کے مغربی کنارے پر واقع سلفیت کے علاقے کی مسجد پر غیر قانونی اسرائیلی آباد کاروں کی جانب سے حملہ کیا گیا جس دوراناسرائیلی آباد کاروں نے مسجد کے داخلی دروازے کو آگ لگاتے ہوئے توڑ پھوڑ کی اور مسجد کی دیواروں پر اسپرے پینٹ میں کلچر اور دھمکی آمیز نعرے لکھے ۔یہودی آباد کاروں کی جانب سے مسجد کی دیوار پر ‘عربوں کی موت’ اور ‘ بدلہ ’ جیسے ناپاک نعرے درج کیے گئے ۔مسجد سے سامنے آئی ویڈیو میں ایک نقاب پوش شخص سمیت کچھ لوگوں کو مسجد کی دیواروں پر اسپرے پینٹ کرتے ہوئے دیکھا جا سکتا ہے ۔ادھر سوئیڈن نے اقوام متحدہ کے امدادی ادارے کو مزید فنڈز دینے سے انکار کردیا ہے ۔ ڈاکٹرز ودآؤٹ بارڈرز نے نئی رپورٹ میں انکشاف کیا ہے کہ غزہ میں اسرائیلی فوج کی جانب سے نسل کشی کے واضح ثبوت ملے ہیں۔
