عظمیٰ نیوزڈیسک
نئی دہلی//دہلی این سی آر میں سردی کی شدت میں مسلسل اضافہ ہو رہا ہے۔ پیر کی صبح ہلکی دھند چھائی رہی جبکہ منگل سے گھنے کوہرے کے ساتھ سردی کی لہر کی پیشین گوئی کی گئی ہے۔ محکمہ موسمیات کے مطابق منگل سے درجہ حرارت میں مزید کمی ہوگی، جس کے نتیجے میں کم از کم درجہ حرارت 4ڈگری سیلسیس تک گر سکتا ہے اور زیادہ سے زیادہ درجہ حرارت 22 ڈگری تک محدود رہے گا۔پیر کو دہلی کا کم از کم درجہ حرارت 5 ڈگری اور زیادہ سے زیادہ 23 ڈگری رہا۔ محکمہ موسمیات نے پیشگوئی کی ہے کہ 17دسمبر سے کولڈ ویو کے اثرات نمایاں ہوں گے، اور 18 دسمبر کو درجہ حرارت مزید کم ہو کر 4 ڈگری تک پہنچ جائے گا۔ 20 دسمبر کو دہلی اور این سی آر میں گھنے کوہرے کے باعث حد نگاہ متاثر ہو سکتی ہے، جس سے ٹریفک کی روانی میں مشکلات کا سامنا ہوگا۔دوسری جانب، تمل ناڈو کے ساحلی اضلاع میں منگل سے بھاری بارش کا امکان ہے۔ محکمہ موسمیات نے بتایا کہ بنگال کی کھاڑی کے جنوب مشرق میں بننے والے کم دبا کے علاقے کے باعث تمل ناڈو اور پڈوچیری میں بارش کا سلسلہ شروع ہوگا۔چنئی، کڈالور، مئیلادوتھرائی، ناگاپٹنم اور دیگر ساحلی اضلاع میں شدید سے بہت شدید بارش کی پیشگوئی کی گئی ہے۔ اس دوران، مچھلی پکڑنے والے افراد کو سمندر میں جانے سے اجتناب کرنے کی ہدایت دی گئی ہے۔تمل ناڈو میں رواں شمال مشرقی مانسون کے دوران اوسط سے 14فیصد زیادہ بارش ریکارڈ کی گئی ہے۔ تاہم، حالیہ چکرہ طوفان فینگل کے باعث ہونے والی تباہی کے بعد، نئی بارشوں کے امکانات نے مقامی افراد کی مشکلات میں اضافہ کر دیا ہے۔محکمہ موسمیات نے خبردار کیا ہے کہ آئندہ دنوں میں موسم کی شدت سے متاثرہ علاقوں میں احتیاطی تدابیر اختیار کی جائیں۔ دہلی-این سی آر کے لوگ سردی اور کوہرے کے لیے تیار رہیں، جبکہ تمل ناڈو میں رہنے والے بارش کے دوران حفاظتی اقدامات کریں۔
