یو این آئی
نئی دہلی//راجیہ سبھا میں بدھ کو کانگریس کی سابق صدر سونیا گاندھی اور امریکی سرمایہ کار جارج سوروس کے درمیان تعلقات کو لے کر زبردست ہنگامہ ہوا، جس کی وجہ سے ایوان کی کارروائی دن بھر کیلئے ملتوی کرنی پڑی۔ اس سے پہلے بھی اسی معاملے پر ایوان کی کارروائی 12 بجے تک ملتوی کر دی گئی تھی۔ پہلے التوا کے بعد ڈپٹی چیئرمین ہری ونش نے ایوان میں وقفہ سوال شروع کرنے کی کارروائی شروع کی تو حکمراں اور اپوزیشن کے ارکان تیز آواز میں بولنے لگے۔قائد ایوان جگت پرکاش نڈا نے کہا کہ گزشتہ دو دنوں سے ممبران گاندھی اور سوروس کے تعلقات کو لے کر مشتعل ہیں۔ یہ تعلقات ملک کی خود مختاری اور سالمیت پر اثرانداز ہو سکتے ہیں۔ یہ تعلقات ملک کی اندرونی اور بیرونی سلامتی کے لیے خطرہ ہیں۔ انہوں نے کہا کہ ملک کو ان تعلقات کی حقیقت جاننے کا حق ہے، اس لیے ایوان میں اس پر بحث ہونی چاہیے۔ نڈا نے کہا کہ کانگریس اس مسئلہ پر بحث سے بچنے کے لئے ملک کی توجہ ہٹانا چاہتی ہے اس لئے چیئرمین کے خلاف تحریک عدم اعتماد لائی ہے۔ انہوں نے کہا کہ کانگریس کی قیادت میں اپوزیشن آئینی اداروں پر حملہ کر رہی ہے اور ان کی توہین کر رہی ہے۔ اپوزیشن نے آئینی عہدوں پر فائز لوگوں کی کبھی عزت نہیں کی اور ایوان کے اندر اور باہر مسلسل توہین آمیز سلوک کرتی ہے۔ انہوں نے کہا کہ کانگریس سرمایہ کار سوروس کا آلہ کار بن چکی ہے اور اس کی سخت مذمت کی جانی چاہئے۔ اس دوران ایوان میں دونوں فریقوں کی طرف سے شور شرابہ اور نعرے بازی ہوتی رہی۔ مسٹر ہری ونش دونوں فریقوں سے پرسکون رہنے کی اپیل کرتے رہے لیکن ہنگامہ بڑھتا گیا۔ اس کے بعد انہوں نے ایوان کی کارروائی جمعرات تک ملتوی کرنے کا اعلان کردیا۔
لوک سبھا کی کارروائی دوپہر دو بجے تک ملتوی رہی
یو این آئی
نئی دہلی//لوک سبھا میں بدھ کو کانگریس کے ڈپٹی لیڈر گورو گوگوئی نے حکومت پر الزام لگایا کہ وہ امریکی تاجر جارج سوروس کی آڑ میں اپنی ناکامیوں کو چھپا رہی ہے، جس کے بعد ایوان میں حکمراں جماعت اور اپوزیشن کے درمیان گرما گرم بحث اور ہنگامہ آرائی سے ایوان میں خلل پڑا، جس کی وجہ سے کارروائی دوپہر 2 بجے تک ملتوی کردی۔وقفہ صفر کے دوران، مسٹر گوگوئی نے منی پور کی صورتحال پر اپنی تشویش کا اظہار کر تے ہوئے حکومت پر ریاست کو نظر انداز کرنے کا الزام لگا یا ۔ انہوں نے کہا کہ وزیر اعظم کب منی پور کا دورہ کریں گے، وزیر داخلہ کب منی پور میں حالات کو معمول پر لانے کے لیے کئے جانے والے اقدامات کے بارے میں اطلاعات دیں گے۔ اس کے ساتھ انہوں نے کہا کہ اپنی ناکامی چھپانے کے لیے جارج سوروس کا نام لیا جا رہا ہے۔جب گوگوئی نے یہ کہا تو کانگریس کے اراکین شور مچانے لگے۔ اس کے ساتھ ہی مرکزی وزیر برائے صنعت وتجارت پیوش گوئل نے کہا کہ کانگریس قیادت کا جارج سوروس کے ساتھ کیا گٹھ جوڑ ہے۔ ملک کو درپیش سنگین مسائل کانگریس نے پیدا کیے ہیں۔ گوئل کے یہ کہنے کے بعد کانگریس کے اراکین مزید مشتعل ہوگئے۔ وہ ایوان کے وسط میں آگئے اور انہوں نے شور مچانا شروع کردیا۔ اس دوران بھارتیہ جنتا پارٹی کے کچھ اراکین اپنی اپنی نشست پر کھڑے ہو کر شور مچانے لگے۔ بڑھتے ہوئے ہنگامے کو دیکھتے ہوئے پریذائیڈنگ آفیسر سندھیا رائے نے ایوان کی کارروائی دوپہر دو بجے تک ملتوی کر دی۔
