محمد تسکین
بانہال// جموں و کشمیر میں عوامی سرکار کے وجود میں آتے ہی مختلف محکموں میں کام کرنے والے ڈیلی ویجر اپنی مانگوں کو لیکر احتجاج اور ہڑتالوں پر اتر آنا شروع ہوئے ہیں اور امید اور مانگ کرتے ہیں کہ نیشنل کانفرنس حکومت ان کی مستقلی سمیت دیگر مسائل کو ترجیحی بنیادوں پر حل کرے۔ جموں سرینگر قومی شاہراہ پر واقع میونسپل کونسل بانہال میں کام کرنے والے کیجول لیبر صفائی کرمچاریوں نے بھی اپنی مانگوں کو لیکر پیر کی صبح سے غیر معینہ مدت کی کام چھوڑ ہڑتال شروع کر دی ہے اور انہوں نے میونسپل اور ایس ڈی ایم کے مشترکہ احاطے میں اپنی مانگوں کو لیکر نعرے بلند کئے۔ تین سو روپئے روزانہ کی قلیل رقم پر کام کرنے والے دہاڑی دار صفائی کرمچاریوں نے بتایا کہ وہ پچھلے پندرہ سے بیس سال سے کام اپنا کام بغیر کسی ناغہ یا چھٹی کے انجام دے رہے ہیں مگر انہیں مستقل کرنے کے بارے میں ابھی تک کسی بھی سرکار اور محکمہ بلدیات کے حکام نے کچھ بھی نہیں سوچا ہے اور اس سمت میں کسی بھی قسم کے اقدامات نہیں کئے گئے ہیں۔ انہوں نے کہا کہ بیشتر عارضی ملازم مستقل ہوئے بغیر ہی اپنی ریٹائرمنٹ کو پہنچ رہے ہیں جبکہ کئی ملازمین ریٹائر بھی ہوچکے ہیں ۔ انہوں نے کہا کہ کار سرکار انجام دینے کیلئے وہ بائیس سال پہلے گھروں سے خالی ہاتھ نوکری کرنے آئے تھے اور اب مستقل نوکری کی امیدیں ٹوٹ گئی ہیں اور وہ اب مستقلی کے بغیر ہی ریٹائرمنٹ کوپہنچ گئے۔ انہوں نے کہا کہ اس نا انصافی نے ان کے بچوں کے مستقبل کو اندھیروں میں دھکیل دیا ہے اور فیس نہ ہونے سے بچوں کو سکولوں سے نکالا جاتا ہے اور گھر گرہستی کو چلانے میں وہ قرض کے بوجھ تلے دب گئے ہیں ۔ انہوں نے موجودہ حکومت سے مطالبہ کیا کہ وہ میونسپل کونسل بانہال اور رام بن میں کام کرنے والے ڈیلی ویجروں کو جلد از جلد مستقیل کرنے کے احکامات صادر کریں اور ان کی اب تک کی سروسز کا انہیں پورا پورا فائدہ دیا جائے تاکہ مستقبل کے حوالے سے ان کی پریشانیوں کا خاتمہ ہو سکے ۔اس سلسلے میں بات کرنے پر ایگزیکٹو آفیسر میونسپل کونسل بانہال ذوالفقار ملک نے کشمیر عظمی کو بتایا کہ ڈیلی ویجر صفائی کرمچاریوں کا معاملہ جائز ہے اور اس سلسلے میں ڈائریکٹر لوکل باڈیز جموں کو ان کی مانگوں کے حوالے سے لکھا گیا ہے اور انہیں امید ہے کہ ان کے دیرینہ مسئلے کا کوئی نہ کوئی حل جلد ہی نکالا جائیگا۔ انہوں نے کہا کہ قصبہ بانہال میں صفائی و ستھرائی کیلئے مستقل صفائی کرمچاری کام کر رہے ہیں اور قصبہ میں آج سے شروع ہوئی ڈیلی ویجروں کی ہرتال سے صفائی اور ستھرائی میں کوئی کمی واقع ہونے نہیں دی جائیگی۔
حکومت احتجاجی صفائی کرمچاریوںسےبات کرے:منجیت سنگھ
وجے پور//اپنی پا رٹی کے صوبائی صدر اور سابق وزیر ایس منجیت سنگھ نے وجے پور اور سانبہ ضلع میں صفائی کرم چاریوں کی طرف سے اٹھائی گئی شکایات کے ازالے کا مطالبہ کیا۔سابق وزیر نے ضلع سانبہ کے رام گڑھ اور وجے پور میں صفائی ستھرائی اور بکھرے ہوئے کچرے پر شدید تشویش کا اظہار کیا۔انہوں نے مزید کہا “سفاری کرم چاری اپنے مطالبے کی حمایت میں احتجاجی مظاہرے کر رہے ہیں جس کے لیے حکومت کی طرف سے ایک انسانی نقطہ نظر کی ضرورت ہے اور ان کا حقیقی مطالبہ پورا کیا جائے”۔انہوں نے مزید کہا کہ مذکورہ علاقوں میں صفائی کی صورتحال بہتر نہیں ہے جہاں سڑکوں پر کچرے کے ڈھیر بکھرے ہوئے دیکھے جا سکتے ہیں اور رہائشی علاقوں میں ہڑتال کی وجہ سے جمع کرنے اور اسے ٹھکانے لگانے کا کام نہیں کیا جا رہا ہے۔انہوں نے حکومت سے مطالبہ کیا کہ وہ احتجاج کرنے والے لوکل اربن باڈی کی صفائی کرم چاری تک پہنچیں اور اس مسئلے کو خوش اسلوبی سے حل کریں۔
