عظمیٰ نیوز ڈیسک
نئی دہلی//طیاروں کو بم سے اڑانے کی دھمکی کا معاملہ تھمنے کا نام نہیں لے رہا ہے۔ جمعرات کو ایک بار پھر کم از کم 85طیاروں کو بم سے اڑانے کی دھمکیاں ملی ہیں۔ جو خبریں موصول ہو رہی ہیں اس کے مطابق ایئر انڈیا کے 20، انڈیگو ایئرلائن کے 20، وستارا ایئرلائن کے 20 اور اکاسا ایئرلائن کے 25طیارے شامل ہیں۔گزشتہ کچھ دنوں سے طیاروں کو بم سے اڑانے کی دھمکیاں لگاتار مل رہی ہیں۔ اس سلسلے میں لگاتار اعلی سطحی میٹنگیں ہو رہی ہیں اور مرکز نے سخت قانونی کاروائی کرنے کا حکم بھی صادر کر دیا ہے۔ اس کے باوجود دھمکیوں کا سلسلہ تھمنے کا نام نہیں لے رہا ہے۔ دہلی پولیس نے پچھلے 8 دنوں کے اندر 90 سے زیادہ قومی اور بین الاقوامی طیاروں کو بم سے اڑانے کی دھمکی معاملہ میں 8 الگ الگ ایف آئی آر درج کی ہیں۔ کچھ لوگوں کی گرفتاری بھی عمل میں آئی ہے۔اکاسا ایئرلائن کے ترجمان نے تازہ دھمکیوں کے تعلق سے کہا کہ آج ان کے کچھ طیاروں کو سیکورٹی الرٹ موصول ہوا ہے۔ الرٹ کے بعد اکاسا ایئرلائن کی ایمرجنسی ٹیم حالات کی نگرانی کر رہی ہے اور حفاظتی حکام سے رابطے میں ہیں۔ ترجمان نے یہ بھی بتایا کہ مقامی حکام سے مل کر سیکورٹی اور حفاظتی طریقہ کار پر عمل کر رہے ہیں۔قابل ذکر ہے کہ طیاروں کے علاوہ گوا کے دونوں ایئرپورٹس کو بھی بم سے اڑانے کی دھمکی ملی ہے۔ بم کے خدشہ کے پیش نظر دونوں ہوائی اڈوں کو ہائی الرٹ پر رکھا گیا ہے۔ خطرات کا جائزہ لینے کے لئے دونوں ہوائی اڈوں کے لئے بم تھریٹ اسسمنٹ کمیٹی (بی ٹی اے سی) تشکیل دی گئی ہے۔ یہ دھمکیاں سوشل میڈیا پلیٹ فارم کے ذریعہ دی جا رہی ہیں۔ اس تعلق سے مرکزی حکومت نے میٹا اور ایکس سے جانچ میں تعاون کے لئے بھی کہا ہے۔
