اشتیاق ملک
ڈوڈہ //ڈوڈہ کے نیرو نالہ بھدرواہ میں ایک طالب علم ڈوب کر جاں بحق ہوگیا۔اطلاعات کے مطابق گورنمنٹ ہائر سیکنڈری سکول کاستی گڑھ کے طلباء بھدرواہ کی سیر پر گئے ہوئے تھے جس دوران ٹھنٹھہرا کے مقام پر وہ نہانے گئے جہاں پر زاہد منظور( 16)ولد منظور احمد ساکنہ کاستی گڑھ نالہ میں غرقاب ہوا اور کچھ ہی دوری پر اس کی لاش برآمد ہوئی۔اس حادثہ کے فوراً بعد مقامی لوگ و پولیس کی ٹیم موقع پر پہنچی اور بچاؤ کاروائی شروع کی۔ مہلوک طالب علم کی لاش کو نالہ سے نکال کر بھدرواہ ہسپتال منتقل کیا ہے جہاں پر ڈاکٹروں نے تمام طبی لوازمات مکمل کرکے لاش کو وارثین کے سپرد کیا ہے۔ادھر پولیس نے معاملہ درج کر کے مزید تحقیقات شروع کی ہے۔
