اشتیاق ملک
ڈوڈہ //ضلع کانگریس کمیٹی کی جانب سے ڈوڈہ میں سرکار مخالف احتجاج کیا گیا جس میں مختلف علاقوں سے آئے پارٹی کے کارکنوں نے شرکت کی۔ضلع صدر شیخ مجیب علی کی قیادت میں کانگریس کارکنوں نے یوٹی و مرکزی حکومت پر عوام دشمن پالیسیاں بنانے کا الزام عائد کرتے ہوئے کہا کہ موجودہ حکومت بے روزگاری، مہنگائی پر قابو پانے میں ناکام رہی ہے۔ انہوں نے کہا کہ بی جے پی حکومت نے 5 اگست 2019 کو جموں و کشمیر کی خصوصی حیثیت کو منسوخ کرکے ترقی، خوشحالی و امن کے دعوے کیے لیکن تب سے امن اور نہ ہی کسی قسم کی خوشحالی دیکھنے کو ملی۔ انہوں نے کہا کہ بی جے پی سرکار میں بھرتی عمل میں بڑے بڑے گھوٹالے سامنے آئے اور سینکڑوں تعلیم یافتہ نوجوانوں کو نظر انداز کیا گیا. کانگریس ضلع صدر نے میڈیا سے گفتگو کرتے ہوئے کہا کہ مہنگائی عروج پر ہے اور عام آدمی کا جینا مشکل بن گیا ہے. انہوں نے کہا ہزاروں تعلیم یافتہ نوجوان روزگار کی تلاش میں در در بھٹک رہے ہیں اور کئی نوجوان ذہنی پریشانی دیگر برائیوں کا شکار ہوئے ہیں. انہوں نے مقامی پروجیکٹوں میں بھی انہیں روزگار فراہم نہیں کیا جاتا ہے بلکہ یہاں بی جے پی لیڈروں کے منظور نظر لوگوں و بیرونی ریاستوں سے آئے افراد کو ترجیح دی جارہی ہے جوکہ افسوسناک ہے. انہوں نے کہا کہ سینکڑوں کی تعداد میں ڈیلی ویجر ورکرز قلیل سی تنخواہ پر اپنی خدمات انجام دے رہیں اور ان کی مستقلی کے لیے سرکار نے کوئی اقدامات نہیں کئے ہیں. مظاہرین نے مزید کہا کہ بجلی کی ناقص کارکردگی کے باوجود ماہانہ کرایا میں اضافہ کیا گیا ہے. انہوں نے کہا کہ کانگریس سماج کے سبھی طبقوں کی آواز بن کر ملک بھر میں کام کررہی ہے اور عوامی مسائل کے حل کیلئے سڑکوں پر اتررہی ہے.انہوں نے کہا کہ ریاستی درجہ کی بحالی تک کانگریس اپنی جدوجہد جاری رکھے گی۔
