عظمیٰ نیوزسروس
نئی دہلی//نیشنل کانفرنس کے رکن پارلیمنٹ روح اللہ مہدی نے پیر 29 جولائی کو جموں و کشمیر میں جلد از جلد انتخابات کرانے کا مطالبہ اٹھایا۔سپریم کورٹ نے الیکشن کمیشن کو جموں و کشمیر میں 30ستمبر تک انتخابات کرانے کی ہدایت دی تھی تاہم الیکشن کمیشن نے ابھی تک انتخابات کے شیڈول کا اعلان نہیں کیا ہے۔ لوک سبھا میں مرکزی بجٹ پر بحث میں حصہ لیتے ہوئے مہدی نے کہا کہ صرف ایک مہینہ باقی ہے اور انتخابات کے انعقاد کے لیے کوئی عمل شروع نہیں کیا گیا ہے۔انکاکہناتھا’’میں یہاں الیکشن کی بھیک مانگنے نہیں آیا ہوں۔ سپریم کورٹ نے اس حکومت کو ہدایت دی تھی کہ ستمبر تک جمہوری حکومت تشکیل دی جائے۔ صرف ایک مہینہ باقی ہے، اور ابھی تک انتخابات کے لیے کوئی عمل شروع نہیں ہوا ہے‘‘۔انہوں نے مزید کہا کہ ’’میری درخواست ہے کہ جمہوریت کی روح کے لیے انہیں ہدایت دیں کہ سپریم کورٹ کے حکم پر عمل کیا جائے اور انتخابات کرائے جائیں‘‘۔گزشتہ دسمبر میں، سپریم کورٹ نے آرٹیکل 370 کی دفعات کو منسوخ کرنے کے مرکز کے فیصلے کو برقرار رکھا، جس نے سابقہ ریاست جموں و کشمیر کو خصوصی درجہ دیا تھا، اور جلد از جلدریاست کی بحالی کی ہدایت کی۔اس میں کہا گیا تھا کہ اسمبلی انتخابات 30 ستمبر 2024 تک ہونے چاہئیں۔مارچ میں لوک سبھا انتخابات کے شیڈول کا اعلان کرتے ہوئے الیکشن کمیشن نے کہا تھا کہ جموں و کشمیر میں اسمبلی اور پارلیمانی انتخابات کا ایک ساتھ انعقاد لاجسٹک اور سیکورٹی وجوہات کی وجہ سے عملی نہیں تھا۔جب بھی جموں و کشمیر میں اسمبلی انتخابات ہوں گے، یہ اگست 2019 میں آئین کے آرٹیکل 370 کی منسوخی اور جموں و کشمیر کو دو مرکز کے زیر انتظام علاقوں میں تقسیم کرنے کے بعد پہلا ہوگا۔
