یواین آئی
نئی دہلی// وزیر اعظم نریندر مودی نے لوگوں سے کھادی اور ہینڈلوم مصنوعات خریدنے کی اپیل کرتے ہوئے کہا ہے کہ ہم وطنوں کے تعاون سے پہلی بار کھادی کا کاروبار 1.5 لاکھ کروڑ روپے کو عبور کر گیا ہے ۔مودی نے ہریانہ کے روہتک ضلع میں ‘اُنّتی سیلف ہیلپ گروپ’ سے منسلک خواتین کی ہینڈلوم مصنوعات کی خاص طورپر تعریف کرتے ہوئے لوگوں سے کہا کہ وہ انہیں خریدیں اور فروغ دیں۔وزیر اعظم نے اتوار کو اپنے ریڈیو پروگرام من کی بات میں کہا، سوچئے ، ڈیڑھ لاکھ کروڑ روپے ! اور جانتے ہیں کھادی کی فروخت میں کتنا اضافہ ہوا ہے ؟400 فی صد ۔انہوں نے کہا کہ اس سے ملک میں بڑی تعداد میں روزگار کے نئے مواقع بھی پیداہورہے ہیں۔ ان کا کہنا تھا کہ اس صنعت سے سب سے زیادہ خواتین جڑی ہیں، اس لئے سب سے زیادہ فائدہ بھی انہیں کو ہوگا۔روہتک میں ہینڈلوم انڈسٹری سے وابستہ خواتین کی تعریف کرتے ہوئے انہوں نے کہا کہ اپنی محنت سے ان ڈھائی سو خواتین نے اپنی زندگی میں خوشحالی کے رنگ بھرے ہیں۔ انہوں نے کہا، ‘‘کپڑوں پر رنگوں کا جادو بکھیرنے والی یہ یہ خواتین آج لاکھوں روپے کما رہی ہیں۔ ان کے بنائے ہوئے بیڈ کور، ساڑھیوں اور دوپٹوں کی مارکیٹ میں بہت زیادہ مانگ ہے ۔مودی نے کہا کہ کچھ ہی دن بعد 7 اگست کو ہم ‘‘نیشنل ہینڈلوم ڈے ’’ منائیں گے ۔انہوں نے کہا، “چاہے وہ اڈیشہ کی ‘سنبلپوری ساڑھی’ ہو، مدھیہ پردیش کی ‘ماہیشوری ساڑی’، ہو، مہاراشٹر کی ‘پیٹھنی’ ہو یا ودربھ کی ‘ہینڈ بلاک پرنٹ’ ہو، ہماچل کے بھوٹیکو کی شالیں اور اونی کپڑے ہوں۔ ، یا پھرجموں و کشمیر کی ‘کانی’ شالیں ہوں۔ ملک کے کونے کونے میں ہینڈلوم کاریگروں کا کام چھایا ہوا ہے ۔انہوں نے کہا،‘‘یہ اچھی بات ہے کہ بہت سے لوگ اپنے یہاں کی ایسی مقامی مصنوعات کو مقبول بنانے میں مصروف ہیں۔ آپ بھی ‘اپنے ہیش ٹیگ مائی پروڈکٹ مائی پرائڈ’ کے نام سے سوشل میڈیا پر اپنی مصنوعات کو اپلوڈ کریں۔ آپ کی یہ چھوٹی سی کوشش، بہت سے لوگوں کی زندگیاں بدل دے گی۔لوگوں سے کھادی اور ہینڈلوم کی مصنوعات خریدنے کی اپیل کرتے ہوئے ، مسٹر مودی نے کہا، “میری آپ سے ایک بار پھر درخواست ہے ، آپ کے پاس مختلف قسم کے کپڑے ہوں گے اور اگر آپ نے اب تک کھادی کے کپڑے نہیں خریدے ہیں، تو اس سال سے شروع کریں۔ اگست کا مہینہ آہی گیا ہے ، آزادی کا مہینہ ہے ، انقلاب کا مہینہ ہے ۔ کھادی خریدنے کا اس سے بہتر موقع کیا ہو سکتا ہے ۔
………………………………………..
