عظمیٰ نیوز سروس
جموں//چیئرمین ڈی پی اے پی غلام نبی آزاد نے ہیرا نگر، کٹھوعہ میں ایک جلسہ عام سے خطاب کرتے ہوئے اتحاد کی اہمیت پر روشنی ڈالی اور ووٹروں پر زور دیا کہ وہ پارلیمنٹ میں عوامی مسائل کو اٹھانے کے لئے وقف امیدواروں کو ترجیح دیں۔ انہوں نے ووٹروں سے اپیل کی کہ وہ ایسے امیدواروں پر غورکریں جو عوامی مفادات کی نمائندگی کرنے اور پارلیمنٹ میں اپنے تحفظات کی وکالت کرنے کے پابند ہو۔ موصوف نے کہاکہ ’’اتحاد ترقی کا سنگ بنیاد ہے، یہ ضروری ہے کہ ہم ایسے نمائندوں کو منتخب کریں جو عوام کی ضروریات اور خواہشات کو ترجیح دیں ‘۔ انہوں نے ایل او پی کے طور پر پارلیمنٹ میں بڑے مسائل اٹھانے کے اپنے ریکارڈ کو اجاگر کیا۔ اس کے برعکس دوسری پارٹیوں کے منتخب نمائندے خاموش تماشائی بنے رہے ۔آزاد نے کہاکہ’’ اگر آپ کو عوامی مسائل اٹھانے کی ضرورت ہے تو آپ ہماری پارٹی کو ووٹ دیں، جس کا نشان بالٹی ہے‘‘۔انہوں نے ایسے نمائندوں کو منتخب کرنے کی اہمیت پر زور دیا جو عوام کے تحفظات کے ساتھ فعال طور پر مشغول ہوں ۔انہوں نے ووٹروں پر زور دیا کہ وہ امیدواروں کے ٹریک ریکارڈ پر غور کریں اور پارلیمنٹ میں کمیونٹی کے مفادات کی وکالت کرنے والوں کو ترجیح دیں۔ ریاست کا درجہ اور خطے میں زمین اور ملازمتوں کے تحفظ کے لئے ان کی کوششیںکرنے والوں کا انتخاب کریں ۔سابقہ ریاستی وزیر اعلیٰ نے کہاکہ ’’ہمیں اپنی ریاست کا دوبارہ دعویٰ کرنا چاہیے اور پارلیمنٹ میں اپنی زمین اور ملازمت کے حقوق کے لئے لڑنا چاہیے‘‘۔انہوں نے مزید کہا کہ ’’جموں و کشمیر کے لوگوں کے مفادات کی وکالت کے لئے پارلیمنٹ میں مضبوط موجودگی ضروری ہے۔ انہوں نے لوگوں پر زور دیا کہ وہ ریاست کا درجہ حاصل کرنے اور جموں و کشمیر کے لوگوں کے حقوق کے تحفظ کے لیے ڈی پی اے پی کی کوششوں کی متحد ہو کر حمایت کریں۔انھوں نے غریبوں اور ضرورت مندوں کی بہتری کے لئے اپنے مشن پر زور دیتے ہوئے کہاکہ’’میرا واحد مقصد اپنے لوگوں کی خدمت کرنا ہے، اسی لئے میں اپنی ریاست واپس آیا ہوں۔‘‘ آزاد نے جموں و کشمیر کی بہتری کے لئے اپنی وابستگی کا اعادہ کرتے ہوئے اس کے عوام کی فلاح و بہبود کے لئے انتھک محنت کرنے کا وعدہ کیا۔آزاد نے تمام شہریوں کے مفادات کی خدمت کے لئے ان کی لگن کی بنیاد پر نمائندوں کا انتخاب کرنے کی ضرورت پر زور دیا۔
