عظمیٰ ویب ڈیسک

سرینگر// صوبائی کمشنر کشمیر وجے کمار بدھوری نے بدھ کے روز کہا کہ سرینگر میں شروع کیے گئے فلائی اوورز پر کام تیز رفتاری سے جاری ہے اور امید ہے کہ بمنہ اور صنعت نگر فلائی اوورز 2024 کے وسط تک تیار ہو جائیں گے اور عوام کے لیے وقف کر دیے جائیں گے۔
صوبائی کمشنرکشمیر نے کہا،”اگر آپ سرینگر فلائی اوور پر کام دیکھیں گے تو شروع کیے گئے کام کی رفتار تیز ہو گئی ہے۔ حکام کام کے عمل پر گہری نظر رکھے ہوئے ہیں اور امید ہے کہ 2024 کے وسط تک بمنہ اور صنعت نگر فلائی اوور عوام کے لیے وقف کر دیے جائیں گے”۔
بوٹینگو فلائی اوور پر، صوبائی کمشنر کشمیر نے کہا کہ مذکورہ فلائی اوور پر کام بھرپور طریقے سے کیا گیا ہے اور امید ہے کہ نیشنل ہائی ویز اتھارٹی آف انڈیا (این ایچ اے آئی) رواں سال کے آخر تک اس پر دو طرفہ ٹریفک کی اجازت دے گی۔
اُنہوں نے کہا کہ 15 نومبر کی ڈیڈ لائن تھی لیکن کچھ رکاوٹوں کی وجہ سے وہ پوری نہیں ہو سکی۔ اب مسائل کو حل کر لیا گیا ہے اور این ایچ اے آئی کو 31 دسمبر سے مذکورہ فلائی اوور پر دو طرفہ ٹریفک کی اجازت دینے کا امکان ہے۔