یو این آئی
سرینگر// مائسمہ اور فقیر گوجری علاقوں میں آتشزدگی کی وارداتوں میں چار مکانوں کو نقصان پہنچا ہے۔فائر اینڈ ایمرجنسی عملے کی بروقت کارروائی کے نتیجے میں آگ کو مزید پھیلنے سے روک دیا گیا۔شہر کے گنجان آبادی والے علاقے مائسمہ میں اتوار 12 بجکر 43منٹ پر ایک رہائشی مکان سے آگ نمودار ہوئی جس نے آناًفاناً اپنے متصل دو مکانوں کو لپیٹ میں لے لیا۔فائر اینڈ ایمرجنسی اور مقامی لوگوں کی بروقت کارروائی کے نتیجے میں اگر چہ آگ پر قابو پایا گیاتاہم آتشزدگی کی اس واردات میں ایک مکان پوری طرح سے خاکستر ہوا جبکہ دو کو جزوی نقصان پہنچا ۔دریں اثنا سرینگر کے مضافاتی علاقے فقیر گوجری میں درمیانی شب ایک رہائشی مکان سے آگ نمودار ہونے کی اطلاع ملتے ہی فائر اینڈ ایمرجنسی عملے کے اہلکار جائے موقع پر پہنچے۔معلوم ہوا ہے کہ دور افتادہ علاقے ہونے کے باوجود بھی تین فائر ٹینڈروں کی مدد سے آ گ پر قابو پایا گیا۔
