زاہد بشیر
گول// سنگلدان بلاک میں کافی عرصہ سے بی ڈی او کی اسامی کافی عرصے سے خالی ہونے کی وجہ سے لوگوں کو شدید پریشانیوں کا سامنا کرنا پڑ رہا ہے کیونکہ زمینی سطح کے تمام کام بی ڈی او کے تحت ہی آتے ہیں وہیں اب سرکار نے پیدائشی اور اموات کی اسناد کی ذمہ واری بھی بی ڈی او کو ہی سونپی ہے جس وجہ سے زیادہ تر لوگوں کے کام اب بی ڈی او کے پاس ہی ہوتے ہیں لیکن سنگلدان بلاک جس میں 13 پنچایتیں ہیں ، کافی عرصہ سے بی ڈی او کی اسامی خالی پڑی ہے ۔
مقامی لوگوں نے بلاک دفتر کے سامنے زوردار احتجاج کرتے ہوئے جلد از جلد بی ڈی او کی نشست پُر کرنے کا مطالبہ کیا ۔ مظاہرین نے کہا کہ جہاں سرکار پنچایتوں کے ذریعے سے عوام کے چھوٹے چھوٹے مسائل حل کرنے کا دعویٰ کر رہی ہے وہیں اگر محکمہ دیہی ترقی میں دیکھا جائے تو اس طرح سے ایک آفیسر کی کرسی خالی ہونے سے مسائل حل نہیں ہوتے بلکہ مسائل بڑھ جاتے ہیں اب جبکہ تاریخ پیدائش اور اموات کی اسناد بھی بی ڈی او کے ذریعے ہی بنتے ہیں ۔ انہوں نے کہاکہ بی ڈی او کی کرسی خالی ہونے کی وجہ سے ٹھیکیداروں کی بلیں بھی بند پڑی ہوئی ہیں اور زمینی سطح کے کام پی ایم اے وائی و دیگر کام بھی ٹھپ ہو کر رہ گئے ہیں ۔ انہوں نے گورنر انتظامیہ سے مطالبہ کیا کہ جلد از جلد سنگلدان میں بی ڈی او کی نشست کو پُر کیا جائے تا کہ لوگوں کے مسائل بروقت حل ہو سکیں ۔
