پرویز احمد
سرینگر //بون اینڈ جوائنٹ اسپتال برزلہ کی نئی بلڈنگ کی تعمیر کا کام مکمل ہونے کا نام ہی نہیں لے رہا ہے ۔ نئے بلاک کی تعمیر کی وجہ سے جہاں عام مریضوں اور اسپتال انتظامیہ کو سخت مشکلات کا سامنا ہے، وہیں دوسری جانب عالمی ادارہ صحت نے ایک مرتبہ پھر بلاک کی تعمیر مکمل کرنے میں مزید 6ماہ کی توسیع کردی ہے۔ عالمی ادارہ صحت کی مالی معاونت سے بنے والی نئی بلڈنگ کی تعمیرکا کام اکتوبر 2022 میں ختم ہونا تھا لیکن حکام نے مزید 2ماہ کا اضافہ کرکے 31دسمبر کیا گیا لیکن بلڈنگ کی تعمیر مکمل نہیں ہوئی ۔ 5مارچ 2022کو آگ کی ہولناک واردات میں اسپتال کی بنیادی عمارت جل کر خاکستر ہوگئی تھی۔ اسپتال کے زیر تعمیر بلاک کو اکتوبر تک مکمل کرنے کی یقین دہانی کرائی گئی تھی، لیکن ایسا ممکن نہیں ہوسکا۔ میڈیکل سپر انٹنڈنٹ ڈاکٹرمیاںسہیل نے بتایا ’’ انتظامیہ کا اس میں کوئی بھی رول نہیں ہے ، ہم سے کسی بھی چیز کے بارے میں کچھ بھی نہیں پوچھا جارہا ہے‘‘۔انہوں نے کہا’’ البتہ اتنا ضرور ہے کہ بلڈنگ پر چھت لگائی جارہی ہے ‘‘۔ڈاکٹر سہیل نے مزید بتایا ’’ میں نے سنا ہے کہ عالمی بینک نے بلڈنگ مکمل کرنے کی ڈیڈلائن جون 2023کردی ہے‘‘۔ انہوں نے کہا کہ مریضوں کے ساتھ ساتھ عملہ کو بھی مشکلات کا سامنا ہے کیونکہ سردی کے ایام کے دوران مریضوں کی تعداد بڑھ جاتی ہے۔ پرنسپل جی ایم سی سرینگر ڈاکٹر تنویر مسعود نے کشمیر عظمیٰ کو بتایا ’’ میں نے متعلقہ ایجنسی کے ساتھ نومبر میں میٹنگ کی تھی اور مجھے یقین دہانی کرائی گئی تھی کہ بلڈنگ 31دسمبر 2022تک مکمل ہوجائے گی لیکن ایسا نہیں ہوا ‘‘۔انہوں نے کہا کہ جہاں تک مجھے لگتا ہے کہ بلڈنگ کو مکمل کرنے میں ابھی بھی 2ماہ کا وقت لگ سکتا ہے‘‘۔ انہوں نے کہا کہ بہت ہی فائدہ مند منصوبہ ہے اور نئے بلاک کے مکمل ہونے سے نہ صرف مریضوں کو راحت نصیب ہوگی بلکہ عملہ اور دیگر نیم طبی عملہ کی مشکلات کا بھی کچھ حد تک ازالہ ہوگا۔یہ بات قابل ذکر ہے کہ 88.94کروڑ روپے کی لاگت سے بننے والی اس بلڈنگ میں مریضوں کیلئے 120بستر جبکہ جدید آلات سے لیس 3آپریشن تھیٹر ، فیکلٹی روم، بھونچال سے بچائو کی ٹیکنالوجی، تھیٹر سٹیرائل یونٹ، آئی سی یو،سینٹرل سٹرائل سپلائی ڈیپارٹمنٹ، خصوصی لانڈری، کوڑا جمع کرنے کا نظام جو 140کلو کوڑا روزانہ جمع کرسکتا ہے، شامل ہے۔
بون اینڈ جوائنٹ اسپتال برزلہ کی نئی عمارت کی تعمیر دوسری ڈیڈ لائن میں بھی مکمل نہ ہوسکی،جون 2023نئی ڈیڈ لائن مقرر
