سرینگر//حریت (ع)اور فریڈم پارٹی نے حالیہ انتخابات کے دوران ضلع بڈگام کے مختلف علاقوںمیںجاں بحق کئے گئے نوجوانوں کوخراج عقیدت ادا کرنے کیلئے 14اپریل جمعتہ المبارک کو بڈگام چلو پروگرام کامیاب بنانے کی کشمیری عوام سے اپیل دہراتے ہوئے کہا ہے کہ رواں تحریک آزادی کے موجودہ مرحلہ پر مزاحمتی قیادت کے مشترکہ پروگراموں کو ہر سطح پر کامیاب بنانا بے حد ضروری ہے۔اس دوران مسلم کانفرنس ، محاز آزادی ،ا نٹرنیشنل فورم فار جسٹس اور ینگ مینز لیگ نے بورس گاندربل جاکر وہاں جاں بحق ہوئے نوجوان کے لواحقین سے یکجہتی کا اظہار کیا۔حریت (ع) نے کشمیری عوام کی قربانیوں سے مزین تحریک کے ساتھ مکمل وابستگی اور استقامت کو اس تحریک کی کامیابی کا ناگزیر تقاضا قرار دیتے ہوئے کہا ہے کہ کشمیری عوام جس عزم اور حوصلے کے ساتھ اپنی مبنی برحق جدوجہد کو آگے بڑھا رہے ہیں، اُس نے عالمی سطح پر مسئلہ کشمیر کے حل کے حوالے سے ایک نئی تحریک کو جنم دیا ہے ۔حریت بیان میں کہا گیا کہ حالیہ انتخابات کے دوران فورسز کی کارروائیوں کے دوران جاں بحق کئے گئے افراد کے لواحقین کے ساتھ تعزیت و یکجہتی کے اظہار کے سلسلے میں ایک وفدنے گاندربل جاکر عمر فاروق گنائی کے لواحقین سے تعزیت پرسی کا اظہار کیا۔ وفدمیں غلام نبی زکی ، جعفر کشمیری، فاروق احمد سوداگر، محمد صدیق ہزار اور ساحل احمد وارسمیت مقامی تحریکی اور تنظیمی اراکین شامل تھے۔ بیان کے مطابق اس موقعہ پر حریت چیئرمین میرواعظ عمر فاروق نے ٹیلیفون پر جاں بحق نوجوان کے والد فاروق احمد گنائی کے ساتھ تعزیت و یکجہتی کااظہار کرتے ہوئے انہیں یقین دلایا کہ اُن کے مشن کو منطقی انجام تک لیجانے کیلئے پوری حریت پسند قیادت اور قوم وعدہ بند ہے۔میرواعظ نے مرحوم کے والد کے عزم اور حوصلے کو سراہتے ہوئے تحریک آزادی کی کامیابی اور جاں بحق نوجوان کے بلند درجات کیلئے بھی دعا کی۔اس دوران حریت ترجمان نے مشترکہ مزاحمتی قیادت کی جانب سے حالیہ انتخابات کے دوران ضلع بڈگام کے مختلف علاقوںمیںجاں بحق کئے گئے نوجوانوں کوخراج عقیدت ادا کرنے کیلئے 14اپریل جمعتہ المبارک کو بڈگام چلو پروگرام کامیاب بنانے کی کشمیری عوام سے اپیل دہراتے ہوئے کہا کہ رواں تحریک آزادی کے موجودہ مرحلہ پر مزاحمتی قیادت کے مشترکہ پروگراموں کو ہر سطح پر کامیاب بنانا نہ صرف تحریک اور حالات کا تقاضا ہے بلکہ کشمیری عوام کی قربانیوںکے ساتھ مکمل وابستگی اور وفا کے عملی اظہار کیلئے اس پروگرام کو کامیاب بنانا بیحد ضروری ہے۔فریڈم پارٹی نے پروگرام کی حمایت کرتے ہوئے انجمن شرعی شیعیان کے سربراہ آغا سید حسن کی تجویز کی تائید کرتے ہوئے کہا کہ بہشت زہرا میں نماز جمعہ کے لئے ان کی تجویز قابل عمل ہے ۔موصولہ بیان کے مطابق فریڈم پارٹی نے ٹہاب پلوامہ میں ایک خاتون کی ٹیر گیس شیلنگ میں ہوئی موت پرصدمے کا اظہار کرتے ہوئے کہا کہ فورسز جان بوجھ کر شہری آبادی کے خلاف طاقت کا استعمال کرکے مرعوب کرنا چاہتی ہے۔پارٹی نے اس حادثہ میں جاںبحق خاتون کے لواحقین سے تعزیت اور ہمدردی کا اظہارکیا۔ مسلم کانفرنس کے ایک دھڑے کے چیئرمین شبیر احمد ڈار، محاز آزادی کے ایک دھڑے کے صدر محمد اقبال میر ،ا نٹرنیشنل فورم فار جسٹس کے چیئرمین محمداحسن اونتو اور ینگ مینز لیگ چیئرمین امتیاز احمد ریشی نے جمعرات کوگانڈربل بورس اور چاڈورہ جاکر جاں بحق ہوئے افراد کے اہل خانہ سے تعزیت کی ۔اس موقع پر انہوں نے کہا کہ الیکشن میں بائیکاٹ کرکے عوام نے پوری دنیا کے ساتھ ساتھ بھارت کو بھی ایک پیغام دیا ہے کہ کشمیری عوام اپنی آزادی کیلئے قربانیاں پیش کرتے ہیں اور یہ بائیکاٹ کشمیریوں کی طرف سے ایک ریفرنڈم ہے
بڈگام چلوکامیاب بنائیں،مزاحمتی قائدین کی اپیل
