سکولوں میں یوگا کو لازمی بنانے کی بھاجپالیڈر کی درخواست سپریم کورٹ میں مسترد

نئی دہلی// سپریم کورٹ نے اس درخواست کو مسترد کر دیا جس میں قومی یوگا پالیسی بنانے اور ملک بھر میں پہلی سے آٹھویں کلاس کے طلباء کے لئے یوگا لازمی کرنے کی مانگ کی گئی ہے۔ جسٹس ایم بی لوکر کی قیادت والی بنچ نے درخواست مسترد کرتے ہوئے کہا کہ ایسے معاملے پر حکومت فیصلہ کر سکتی ہے۔ بنچ نے کہا، 'ہم یہ کہنے والے کوئی نہیں ہیں کہ اسکولوں میں کیا پڑھایا جانا چاہئے۔ یہ ہمارا کام نہیں ہے۔ ہم کس طرح اس پر ہدایات دے سکتے ہیں۔عدالت نے کہا کہ اس کے لئے ایسی راحت دینا ممکن نہیں ہے جو درخواست دائر کرنے والے وکیل اور دہلی بی جے پی کے ترجمان اشون کمار اپادھیائے اور جے سی سیٹھ نے مانگی ہے۔ عدالت نے کہا، 'اسکولوں میں کیا پڑھایا جانا چاہئے یہ بنیادی حق نہیں ہے۔ اپادھیائے نے انسانی وسائل کی ترقی کی وزارت، این سی ای آرٹی اور سی بی ایس ای کو یہ ہدایت دینے کی مانگ کی تھی کہ وہ 'زندگی، تعلیم اور مساوات جیسے مختلف بنیادی حقوق کے احساس کو ذہن میں رکھتے ہوئے پہلی سے آٹھویں کلاس کے طالب علموں کے لئے' یوگ اور صحت کی تعلیم 'کی معیاری کتابیں فراہم کرائے۔