خطہ چناب کی سڑکوں پر حادثات کا خونین رقص جاری

بھدرواہ //خطہ چناب میں رونما ہونے والے دو الگ الگ سڑک حادثات میں کم از کم8افراد ہلاک جب کہ 8دیگر شدید زخمی ہو گئے ہیں۔ ذرائع نے بتایا کہ ضلع ڈوڈہ کے تحصیل چراہلہ میں قصبہ ڈوڈہ سے قریب 22کلو میٹر دور سوائی گواڑی چراہلہ سڑک پر ایک مسافر بردار گاڑی پونیجہ کے مقام پر ڈرائیور کے قابو سے باہر ہو کر قریب 150فٹ گہری کھائی میں جا گری۔ ٹریکس گاڑی زیر نمبر JK02AR-8358جس پر 15مسافرسوار تھے چراہلہ سے پل ڈوڈہ کی طرف آر ہی تھی کہ پنیجہ کے مقام پر بھاری بارشوں سے پیدا پھسلن کی وجہ سے سڑک سے لڑھک گئی ۔ ایس ڈی پی او بھدرواہ برجیش شرما نے بتایا کہ حادثہ کی اطلاع ملتے ہی پولیس موقعہ پر پہنچی اور مقامی لوگوں کی مدد سے بچاﺅ کارروائی شروع کی ۔ انہوںنے بتایا کہ 4افراد موقعہ پر ہی لقمہ¿ اجل بن گئے تھے جب کہ 11زخمیوں کو ہسپتال منتقل کیا گیا جن میں سے مزید 2زخمی ڈوڈہ ہسپتال میں زخموں کی تاب نہ لا کر چل بسے جب کہ ایک شخص نے جموں منتقلی کے دوران دم توڑ دیا۔مہلوکین کی شناخت 80سالہ محمد یوسف خان ولد ولی خان ساکن سنار ٹھاوا، اوم پرکاش عمر 30سال ولد ودیا لال ساکن بنکھان، فضل دین ولد روشن دین ساکن جندانی، پنجاب سنگھ ولد خزان چند ساکن بونجواہ، 45سالہ راجیشو سنگھ ولد بدھا سنگھ ساکن رانکا ،55سالہ عبدالرشید ولد منگتا شیخ ساکن درائی گندواور گلاب سنگھ ولد حاکم سنگھ ساکنہ شوا شریرنہکے طور پر کی گئی ہے۔زخمیوں میں پردیپ سنگھ ولد بلونت سنگھ ساکن کوٹھی پنیجہ، وشوا ناتھ ولد چونی لال ساکن پنیجہ، امریک سنگھ ولد ٹھاکر لال ، 10سالہ ونش شرما ولد سریش شرما،6سالہ کارتکا شرما دختر سریش شرما اور ارچنا شرما زوجہ سریش شرما ساکنان بدوت، دلیپ سنگھ ولد ایشر لال ساکن پنیجہ، گلاب سنگھ ولد حاکم سنگھ ساکن شوا شریرنا اور بپن کھجوریہ ولد کرشن کمار ساکن جگوتہ شامل ہےں۔ ابتدائی طبی امداد فراہم کرنے کے بعد پردیپ سنگھ ، ونش شرما اور کارتیکا شرما اور گلاب سنگھ کو ان کی نازک حالت کے پیش نظر جموں میڈیکل کالج ریفر کیا گیا جس دوران گلاب سنگھ ولد حاکم سنگھ ساکنہ بھدرواہ نے اودھمپور کے نزدیک دم توڑ دیا۔ دریں اثنا ضلع کشتواڑ میں رونما ہوئے حادثہ میں ایک ڈرائیور کی موت واقعہ ہو گئی۔ ذرائع نے بتایا کہ پارڈر سے ضلع ہیڈکوارٹر کی طرف جارہا ایک لوڈ کیرئیر زیر نمبر 2125 JK17دوران سفر ڈرائیور کے قابو سے باہر ہوکر اُلٹ گیا۔اس حادثے میں گاڑی کا26سالہ ڈرائیور اختر حسین ساکن لنک روڑ کشتواڑ موقعے پر ہی لقمہ اجل بن گیا۔بعد میں اس کی لاش ضلع اسپتال کشتواڑ پہنچائی گئی جہاں پوسٹ مارٹم انجام دینے کے بعد آخری رسومات کے لئے لاش لواحقین کے سپرد کی گئی۔