راجوری //پیپلز ڈیموکریٹک پارٹی کا ڈاک بنگلہ راجوری میں یک روزہ کنونشن منعقد ہواجس کی صدارت پارٹی کے نائب صدر سرتاج مدنی نے کی۔ کنونشن میں وزیر برائے دیہی ترقی و پنچایتی راج اور قانون عبدالحق خان ، وزیر برائے خوراک ،شہری رسدات و امورصارفین و اطلاعات چوہدری ذوالفقار علی ، ممبراسمبلی راجوری قمر حسین چوہدری ، پارٹی کے ریاستی سیکریٹری شہزاد خان اور ضلع صدر اعجاز مرزا سمیت کئی لیڈران نے شرکت کی ۔سرتاج مدنی نے کہاکہ مرحوم مفتی محمد سعید کو ان کے کاموں اور شخصیت کی وجہ سے یاد رکھاجائے گا۔انہوںنے کہاکہ ماضی کی حکومتوں کے دور میں راجور ی پونچھ خطے کو مکمل طور پر نظرانداز کیاگیاتھاتاہم مفتی سعید نے اپنے دور حکومت نے یہاں تعمیروترقی کی ٹھوس بنیاد رکھی اور مغل روڈ کے ساتھ ساتھ بابا غلام شاہ بادشاہ یونیورسٹی کا قیام عمل میںلایااور پھر لورن ٹنگمرگ سڑک کاکام شروع کیاگیا۔ انہوںنے کہاکہ آج یہ خطہ مرکزیت اختیار کرگیاہے ۔ مدنی نے ہندوپاک کے درمیان بات چیت کرنے کی وکالت کرتے ہوئے کہاکہ پی ڈی پی دونوں ممالک کے درمیان مذاکرات کی وکالت کرتی ہے تاکہ یہ کشیدگی ختم ہوسکے ۔ انہوںنے کہاکہ چکاں دا باغ پونچھ کے راستے تجارت اور بس سروس کا معاملہ حکومت کے زیر غور ہے ۔سرتاج مدنی نے کہا کہ 35Aپر گفتگو کرنا بے سود ہے کیونکہ وزیر اعلیٰ محبوبہ مفتی نے یہ بات مرکزی سرکار پر واضح کردی ہے کہ اگر ریاست جموں وکشمیر کے خصوصی درجے کے ساتھ کوئی بھی چھیڑچھاڑ کی گئی تو ترنگا اٹھانے والا کوئی نہیں ہوگا، اب اس سے بڑھ کر اور کیا کیا جاسکتا ہے ،اسلئے لوگ دیگر جماعتوں کے بہکاوے میں نہ آئیں ۔اپنے خطاب میں عبدالحق خان نے کہاکہ موجودہ حکومت نے مہاتماگاندھی نریگا اور دیگر سکیموں کو کرپشن سے باہر نکال کر ان کے ذریعہ ایسے اثاثے قائم کئے جن کی لوگوں کو بہت زیادہ ضرورت تھی ۔ انہوںنے کہاکہ تین برسوں کے دوران اہم اور قیمتی اثاثے قائم کئے گئے ہیں اور حکومت آگے بھی مزید ایسے کام کرے گی ۔انہوںنے کہاکہ حکومت لوگوں کے مسائل حل کرنے کیلئے دن رات کام کررہی ہے ۔عبدالحق خان نے کہاکہ مفتی مرحوم نے پی ڈی پی کا قیام عمل میں لاکر جموں کشمیر میں ایک نیاسیاسی متبادل فراہم کیا اور پارٹی غریب عوام کی آواز ہے ۔اس موقعہ پر بولتے ہوئے چوہدری ذوالفقار علی نے کہاکہ محبوبہ مفتی کی قیادت میں ریاستی حکومت تعمیروترقی کے نئے مراحل میں داخل ہورہی ہے ۔کنونشن سے چوہدری قمر حسین ، شہزاد خان،اسد باری شاہ،اعجاز مرزا،طاہر لون ، تعظیم ڈار وغیرہ نے بھی خطاب کیا ۔
۔35اے پر بات کرنا بے سود : مدنی
