روہنگیا مسلمانوں کا معاملہ: حکومت نے اپنی پوزیشن واضح کردی ہے: امت شاہ

رانچی//  بی جے پی کے قومی صدر امت شاہ نے کہا ہے کہ روہنگیا مسلمانوں کے سلسلے میں مرکزی حکومت نے سپریم کورٹ میں حلف نامہ داخل کرکے اپنی پوزیشن واضح کردی ہے۔ مسٹر شاہ نے  پارٹی کے ریاستی دفتر میں منعقد ایک پریس کانفرنس میں کہا کہ حکومت ہند روہنگیا مسلمانوں کو میانمار میں ہی ہر ممکن مدد مہیا کرائے گی۔ ایک سوال کے جواب میں انہوں نے کہا کہ ملک میں اپوزیشن کمزور ہورہا ہے تو اسے مضبوط کرنے کا کام بی جے پی کا نہیں ہے بلکہ اپوزیشن کو ہی اپنی پوزیشن مضبوط کرنی ہوگی۔انہوں نے وزیر اعظم نریندر مودی کے تین سال کی حصولیابیوں کا ذکر کرتے ہوئے کہا کہ اس مدت میں ملک میں ذات پات، اقربا پروری اور منہ بھرائی کی سیاست کو اکھاڑ پھینکا گیا ہے اور یوگا کے ذریعہ ہندوستانی ثقافت کو دنیا بھر میں پہنچایا گیا ہے۔