رسیونگ سٹیشنوں کو مرحلہ وار طریقے پر بڑھاوا دیا جائے گا : آسیہ نقاش

جموں//حکومت نے کہا ہے کہ ریاست میں اوور لوڈڈ رسیونگ سٹیشنوں کو بڑھاوا دینے کا کام مرحلہ وار طریقے پر ہاتھ میں لیا جائے گا تا کہ لوگوں کو بہتر بجلی کی سہولیات دستیاب ہو سکیں ۔ بجلی کی وزیر مملکت آسیہ نقاش نے ایوانِ زیریں میں مبارک گُل کی توجہ دلاؤ نوٹس کا جواب دیتے ہوئے کہا کہ اس وقت وادی میں 1900  ایم ڈبلیو  بجلی کی مانگ ہے جس میں سے 1190 میگاواٹ کو پورا کیا جاتا ہے جبکہ باقی کیلئے بجلی کٹوتی کرنا پڑتی ہے ۔ دریں اثنا اے آر راتھر کی توجہ دلاؤ نوٹس کا جواب دیتے ہوئے وزیر موصوفہ نے کہا کہ ککر ناگ علاقے میں بجلی کی صورتحال میں مزید بہتری لانے کیلئے تین بڑے رسیونگ سٹیشنوں کو بڑھاوا دیا جا رہا ہے ۔ انہوں نے کہا کہ علاقے میں بجلی کی صورتحال میں مزید بہتری لانے کیلئے گرڈ سٹیشن بچو کو 100 ایم وی اے تک بڑھاوا دینے کیلئے ایک ڈی پی آر بھی تیار کیا جا رہا ہے ۔