دہشت گردی کے خلاف جنگ

اسلام آباد//پاکستان کے وزیر اعظم عمران خان نے کہا ہے کہ مستقبل میں پاکستان دوسرے ممالک کی لڑائیاں نہیں لڑے گا۔ عمران خان نے یہ بات فوجی ہیڈ کوارٹر میں ایک پروگرام کے دوران کہی۔ انہوں نے راولپنڈی میں جمعرات کو منعقدہ ایک پروگرام میں کہا کہ وہ شروع سے اس جنگ کے خلاف تھے۔ انہوں نے کہا کہ ان کی حکومت کی پالیسی ملک کے عظیم مفادات کے حق میں ہوگی۔ پاکستان کی مسلح افواج کی جنگجوئوں کے خلاف جاری لڑائی کی تعریف کرتے ہوئے انہوں نے کہا کہ ان کی حکومت دہشت گردی کے خلاف جنگ کو اس وقت تک جاری رکھے گی جب تک یہ پوری طرح سے ختم نہیں ہوجاتی۔خان نے کہا کہ جس طرح سے پاکستان کی فوج نے  جنگجوئوں کے خلاف لڑائی لڑی ، ویسا کسی اور ملک نے نہیں کیا۔ انہوں نے کہا کہ ملک کو محفوظ رکھنے کیلئے سیکورٹی فورسیز اور خفیہ ایجنسیوں کا رول انوکھا ہے۔عمران خان نے کہا کہ اللہ تعالیٰ نے پاکستان کو ہر قسم کے وسائل سے نوازا ہے لیکن ہم نے اس کی قدر نہیں کی اور اب پاکستان کو بڑے مسائل درپیش ہیں، ملک قرضوں میں ڈوبا ہوا ہے۔انہوں نے کہا کہ منزل کے حصول کے لیے ہر شہری کو اپنی ذمہ داری ادا کرنا ہوگی، جب کوئی قوم متحد ہوتی ہے تو اعلیٰ مقام حاصل کرتی ہے۔