لاہور//پھانسی کے بعد مجرم کی لاش قانونی کارروائی کے بعد اس کے ورثا کے حوالے کردی گئی جو اسے اپنے ساتھ قصور لے گئے۔پنجاب کے ضلع قصور میں سات سالہ بچی زینب کے زیادتی کے بعد قتل کے مجرم عمران علی کو لاہور کی کوٹ لکھپت جیل میں پھانسی دے دی گئی ہے۔عمران کو انسدادِ دہشت گردی کی ایک عدالت نے زینب قتل کیس میں چار بار موت کی سزا سنائی تھی۔مجرم نے اپنی سزا کے خلاف پہلے ہائی کورٹ اور پھر سپریم کورٹ سے بھی رجوع کیا تھا لیکن دونوں اعلیٰ عدالتوں نے اس کی اپیل مسترد کردی تھی۔عمران کی جانب سے صدرِ مملکت سے کی جانے والی معافی کی درخواست بھی مسترد ہونے کے بعد گزشتہ ہفتے اس کے ڈیتھ وارنٹ جاری کیے گئے تھے جن پر بدھ کو علی الصباح لاہور کی کوٹ لکھپت جیل میں عمل درآمد کردیا گیا۔مجرم کو پھانسی دیے جانے کے وقت زینب کے والد امین انصاری بھی موجود تھے۔پھانسی کے بعد مجرم کی لاش قانونی کارروائی کے بعد اس کے ورثا کے حوالے کردی گئی جو اسے اپنے ساتھ قصور لے گئے۔اس سے قبل منگل کو ملزم کی اس کے اہلِ خانہ سے آخری ملاقات کرائی گئی تھی۔زینب کے والد امین انصاری مجرم عمران علی کو پھانسی دیے جانے کے بعد لاہور کی کوٹ لکھپت جیل سے واپس روانہ ہو رہے ہیں۔گزشتہ روز لاہور ہائی کورٹ نے عمران علی کو سرِ عام پھانسی دینے کی ایک درخواست مسترد کردی تھی۔درخواست زینب کے والد امین انصاری نے دائر کی تھی جن کا موقف تھا کہ سرِ عام پھانسی دینے سے مستقبل میں بچوں کے ساتھ ایسے جرائم روکنے میں مدد ملے گی۔تاہم پنجاب حکومت نے ان کی درخواست کی مخالفت کی تھی جس کی بعد ہائی کورٹ کے دو رکنی بینچ نے یہ درخواست مسترد کردی تھی۔
زینب قتل کیس:مجرم کو لاہور کی کوٹ لکھپت جیل پھانسی دیدی گئی
