لوک پال بل:30 جنوری سے انا ہزارے پھر میدان میں

رالے گاؤں//مشہور سماج خدمت گار انا ہزارے نے وزیراعظم نریندر مودی پر لوک پال اور لوک آیکت کی تقرری کرنے میں ٹال مٹول کا رویہ اپنانے کا الزام لگاتے ہوئے بابائے قوم مہاتما گاندھی کی برسی 30 جنوری سے آندولن کرنے کا اعلان کیا ہے ۔انا ہزارے نے وزیراعظم دفتر میں ریاستی وزیر ڈاکٹر جتیندر سنگھ کو سنیچر کو لکھے خط میں کہا ہے کہ ‘‘حکومت مسلسل یقین دہانی کرانے کے باوجود بھی لوک پال، لوک آیکت کی تقرری نہیں کررہی ہے اس لئے میرے گاؤں رالے گان سدھی میں میں مجبور ہوکر ‘‘مہاتما گاندھی کی برسی 30 جنوری سے سے تحریک شروع کررہا ہوں۔انہوں نے کہا ہے کہ عوام کو دھوکہ دیا جارہا ہے ۔ یہ حکومت اقتدار میں چار برسوں سے زیادہ گذرجانے کے باوجود لوک پال، لوک آیکت کی تقرری نہیں کررہی ہے ۔ ایسا لگتا ہے اس حکومت کا لوک پال، لوک آیکت کی تقرری کرنے کا کوئی ارادہ نہیں ہے ۔دو صفحات میں انا ہزارے نے لوک پال اور لوک آیکت کی تقرری کے سلسلے میں اپنی جدوجہد کی تفصیلات پیش کرتے ہوئے الزام لگایا کہ حکومت مسلسل یقین دہانی کرانے کے باوجود بدعنوانی روکنے کے لئے اہم اداروں میں تقرری کرنے میں ناکام رہی ہے ۔اناہزارے نے خط میں لکھا ہے ک ملک میں بدعنوانی میں اضافے سے تنگ آکر عوام نے 2011 میں لوک پال اور لوک آیکت قانون بنانے کے لئے سڑک پر اتری تھی۔ اس دوران انا ہزارے نے 16 اگست 2011 کو دہلی کے رام لیلا میدان پر بھوک ہڑتال کیا تھا اور 13 دن کے بعد 27 اگست کو اس وقت کے وزیراعظم منموہن سنگھ حکومت نے لوک پال، لوک آیکت کی تقرری کی تحریری یقین دہائی کرائی تھی۔ اسکے بعد انا ہزارے نے بھوک ہڑتال ختم کردیا تھا۔ حکومت نے بعد میں لوک پال، لوک آیکت قانون 2013 میں بنادیا تھا۔انہوں نے کہا ہے کہ ‘‘قانون بننے کے بعد ملک کی عوام کو امید کی کرن دکھائی دے رہی تھی کہ اب لوک پال، لوک آیکت کی تقرری ہوگی اور ملک میں بدعنوانی پر لگام لگے گا لیکن اقتدار کی تبدیلی کے بعد نریندر مودی حکومت اقتدار میں آئی۔ مودی حکومت کے آنے کے بعد ہم نے حکومت سے لوک پال، لوک آیکت کی تقرری کے بارے میں 30 خطوط لکھے مگر مودی جی نے کسی بھی خط کا کوئی جواب نہیں دیا۔مرکزی حکومت پر ٹال مٹول کا رویہ اپنانے کا الزام لگاتے ہوئے انہوں نے کہا ہے کہ مودی حکومت پہلے کہتی تھی کہ منتخب کمیٹی میں اپوزیشن پارٹی کا کوئی لیڈر موجود نہیں ہے اس لئے لوک پال کی تقرری نہیں ہورپاہی ہے ۔ اس کے کچھ دنوں بعد ہی حکومت کہنے لگی کہ منتخب کمیٹی میں سینئر قانون داں نہیں ہیں اس لئے لوک پال، لوک آیکت کی تقرری نہیں کررہی ہے ۔ اس طرح سے کئی بہانے بناکر لوک پال کی تقرری موخر کی جارہی ہے ۔خط میں کہا گیا ہے کہ ‘‘اس حکومت نے چار سال بہانہ بنانے میں گذار دیا۔ حکومت جان بوجھ کر لوک پال، لوک آیکت کی تقرری نہیں کرنے کی وجہ سے چار سال بہانہ بنانے کے بعد میں نے 23 مارچ 2018 کو رام لیلا میدان میں بھوک ہڑتال شروع کیا تھاْ۔[؟]29 مارچ کو وزیراعظم دفتر نے مجھے تحریری یقین دہانی کرائی تھی کہ ہم جلد سے جلد لوک پال، لوک آیکت کی تقرری کریں گے ۔ یقین دہانی کی وجہ سے میں نے بھوک ہڑتال ختم کرتے وقت مہاراشٹر کے وزیراعلی دیویندر فڑنویس اور مودی حکومت کو وقت دیا تھا کہ 2 اکتوبر 2018 کو مہاتما گاندھی کی سالگرہ تک لوک پال، لوک آیکت کی تقرری نہیں ہوئی تو پھر سے تحریک چلائیں گے ۔یو این آئی