کولمبیا میں مسافر طیارہ گرکر تباہ میئر سمیت 14 افراد ہلاک

بگوٹا //  کولمبیا کے صوبے میٹا میں مسافر بردار طیارہ گر کر تباہ ہوگیا، حادثے میں تاریرہ شہر کے میئر سمیت 14 افراد ہلاک ہوگئے۔ خبر رساں ادارے کے مطابق جنوبی امریکی ملک کولمبیا کی نجی ایئرلائن کا طیارہ ڈی سی 3 نے ایک درجن سے زائد مسافروں کو لے کر شہر تاریرہ سے ولاویسینسیو جانے کیلیے اڑان بھری اور آدھی مسافر کے بعد ٹیکنیکل خرابی کے باعث حادثے کا شکار ہوگیا۔ خبر رساں ادارے کا کہنا ہے کہ متاثرہ طیارے کے پائلٹ نے جہاز میں فنی خرابی سے متعلق حکام کو آگاہ کردیا تھا کہ تاہم آگاہی کے فوراً بعد طیارہ میدانی علاقے میں گرکر تباہ ہوگیا۔ کولمبیا کے خبر رساں اداروں کے مطابق ڈی سی 3 نامی طیارے کو پیش آنے والے حادثے میں 14 افراد ہلاک ہوئے ہیں، سول ایوی ایشن نے موسم کی خرابی کے باعث طیارے کو واپس آنے کا بھی کہا تھا کہ اس سے قبل ہی طیارہ حادثے کا شکار ہوگیا۔ میڈیا کا کہنا ہے کہ کولمبین حکام نے طیارہ حادثے کی وجوہات جاننے کیلیے کمیٹی تشکیل دی ہے جو طیارے کا بلیک باکس تلاش کررہی ہے۔ خبر رساں ادارے کا کہنا ہے کہ ڈی سی 3 نامی طیارے 1930 میں بنائے گئے تھے جس میں 30 مسافروں کے سوار ہونے کی گنجائش ہے۔