دوبے انکاؤنٹرمعاملہ

نئی دہلی//سپریم کورٹ نے بدھ کے روز اترپردیش کے خوفناک مجرم وکاس دوبے کے انکاؤنٹر کی تحقیقات کے لئے اپنے سابق جج بی ایس چوہان کی سربراہی میں ایک انکوائری کمیشن کے قیام کی منظوری دے دی۔اتر پردیش حکومت کی طرف سے پیش ہونے والے سالیسیٹر جنرل تشار مہتا نے جسٹس چوہان کا نام عدالت کو تجویز کیا۔مسٹر مہتا نے چیف جسٹس شرد اروند بوبڈے کی سربراہی میں بینچ کو بتایا کہ جسٹس چوہان کمیشن کا حصہ بننے پر راضی ہوگئے ہیں۔ تحقیقاتی ٹیم کا حصہ بننے کے لئے ، انہوں نے سابق ریاستی ڈائریکٹر جنرل پولیس کے ایل گپتا کا نام بھی تجویز کیا۔عدالت نے کہا کہ کمیشن ایک ہفتہ میں اپنا کام شروع کردے گا اور اسے دو ماہ میں اپنی رپورٹ پیش کرنا ہوگی۔سماعت کے دوران جسٹس بوبڈے نے کہا کہ انہوں نے جسٹس چوہان کے ساتھ بھی متعدد مقدمات سنے ہیں، انہوں نے بھی ان کے نام کی تجویز کی۔