جموں // شمالی کمان کے سربراہ ، لیفٹیننٹ جنرل یوگیش کمار جوشی نے کہا ہے کہ ڈائریکٹر جنرل ملٹری آپریشنز (ڈی جی ایم اوز) نے لائن آف کنٹرول (ایل او سی) پر جنگ بندی کا اثر جموں و کشمیر میں انسداد عسکریت پسندی کی کارروائیوں پر نہیں پڑے گا۔اودھم پور میں شمالی کمان کے سربراہ نے کہا کہ پاکستان اور ہندوستان کے ڈائریکٹر جنرل ملٹری آپریشنز نے 24-25 فروری کی شب کو لائن آف کنٹرول پر مشترکہ طور پر جنگ بندی کا اعلان کیا ہے ، تاہم ، میں آپ سب کو یہ یقین دلانا چاہتا ہوں کہ اس جنگ بندی کا جنگجو مخالف کارروائیوں پر کوئی اثر نہیں پڑے گا اور ہم اپنی نگرانی برقرار رکھیں گے ‘‘۔ لیفٹیننٹ جنرل جوشی نے بہادری کیلئے ایک خصوصی تقریب میں افسران ، جونیئر کمیشنڈ آفیسرز (جے سی اوز) اور دیگر زمروں کے لئے ممتاز سروس ایوارڈز بھی پیش کیے۔
ایل او سی پر جنگ بندی کے اعلان کی تعریف کرتے ہوئے لیفٹیننٹ جنرل جوشی نے کہا’’کنٹرول لائن پر جنگ بندی سے لوگوں کو پرامن اور محفوظ زندگی گزارنے میں مدد ملے گی‘‘۔انہوں نے کہا کہ کشمیر میں سلامتی کی صورتحال اور استحکام کو متاثر کن انداز میں نافذ کیا گیا ہے۔ انہوں نے کہا ’’تشدد میں زبردست کمی دیکھنے میں آئی ہے ،جو امن ، سلامتی اور قومی اتحاد کیلئے عوام کی حمایت کو ظاہر کرتی ہے‘‘۔ انہوں نے مزید کہا کہ سیکورٹی فورسز اور جموں و کشمیر کے عوام کی انتھک کوششوں کے نتیجے میں عسکریت پسندوں نے شروع کئے گئے واقعات ، پتھراؤ کی سرگرمیوں اور مظاہروں میں کمی کی ہے۔ آرمی کمانڈر نے کہا کہ ’’جموں ، کشمیر اور لداخ میں ، سیکورٹی کی صورتحال بہتر ہوئی ہے، ہماری کوششیں امن و سلامتی کو برقرار رکھنے کے لئے جاری رہیں گی‘‘۔قبل ازیں ، انہوں نے کہا’’جموں و کشمیر اور شمالی علاقہ جات لداخ میں شمالی کمان تشدد پھیلانے کے لئے پڑوسی ممالک کی کوششوں کے خلاف ڈھال کی طرح کھڑی ہے، مستقبل میں بھی ہم امن اور سلامتی کے لئے کھڑے رہیں گے۔
انہوں نے کہا کہ ہندوستانی فوج نے ملکی سالمیت کو للکارنے والوں کو اسی زبان میں جواب دیا ہے۔"ہم نے دونوں ہمسایہ ملکوں – لائن آف کنٹرول اور لائن آف ایکچول کنٹرول ، لداخ کے ساتھ منسلک سرحد پر بالادستی برقرار رکھی ہے۔ اس کے علاوہ ، ہم نے اندرونی طور پر امن کو برقرار رکھنے میں بھی مدد کی ہے۔انہوں نے کہا کہ ایل اے سی کے برف پوش پہاڑوں / مشکل علاقوں پر تعینات فوجیوں نے 2020 میں خاص طور پر مشکل وقت کے دوران اعلی سطح پرچوکسی برقرار رکھی جو ہندوستانی فوج کی ہمت اور عزم کی ایک مثال ہے۔ انہوں نے مزید کہا کہ آپریشن برفانی چیتے کی کامیابی ہندوستانی فوج کے ہر فوجی کی ہمت کی ایک مثال ہے۔انہوں نے مزید کہا ’’متعدد طریقوں سے ، مشرقی لداخ میں ہندوستانی فوج کے لئے گذشتہ سال ایک تاریخی سال رہا، جہاں فوج نے مشکل وقتوں میں بہادری کے ساتھ ساتھ صبر کا مظاہرہ کیا‘‘۔
