رام بن ضلع میں8مراکز کووڈ مریضوں کیلئے مخصوص
لیول دوم کیلئے 70اور لیول سوئم مریضوں کیلئے440بیڈ مختص
ایم ایم پرویز
رام بن//ہنگامی ضروریات کے پیش نظر ضلعی مجسٹرٹ نے ٹراما سنٹر ڈسٹرکٹ ہسپتال رام بن ، دو سب ڈسٹرکٹ ہسپتالوں اور کمیونٹی ہیلتھ سینٹروں سمیت کچھ سرکاری سکولوں کی عمارتوں کو کوڈ کیئر سنٹر کے طور پرنامزد کیا ہے۔اس سلسلے میں ضلعی مجسٹریٹ مسرت الاسلام کے ذریعہ ایک آرڈر جاری کیا گیا ہے جو ڈسٹرکٹ ڈیزاسٹر مینجمنٹ اتھارٹی کے ذمہ دار بھی ہیں، نے ٹراما سنٹر، ڈسٹرکٹ ہسپتال رام بن کو 20 بستروں پر مشتمل کووڈ کیئر سنٹر ، کمیونٹی ہیلتھ سنٹر ایس ڈی ایچ بانہال کو 40 بستروںاور10بستروں پر مشتمل سی ایچ سی بٹوٹ کولیول دوم کووڈ مریضوں کیلئے کووڈ کیئر سینٹر کے طور نامزد کیاہے۔اسی طرح COVID-19 مثبت مریضوں (لیول III) کی سہولت کے لئے 350 بستروں پر مشتمل جے کے ایس پی ڈی سی دھرماؤنڈکووڈ کئیر سینٹر،15بستروںپر مشتمل ٹورزم گیسٹ ہاؤس سنگلدان،20بستروں پر مشتمل آئی ٹی آئی گول ، 30بستروں پر مشتمل جے کے ٹی ڈی سی رام بن اور 25بستروں پر مشتمل گورنمنٹ ہائرسکینڈری سکول اکھرال کو کووڈ کیئر سینٹروںکے طور نامزد کیا ہے۔مجموعی طور پر نامزد کووڈ کیئر سنٹروں میں510بسترے ہیں جن میں 70لیول دوم اور440لیول سوئم مریضوں کیلئے ہیں۔ یہ تمام آٹھ کووڈ کیئر سینٹرسی ایم او رام بن کی مجموعی نگرانی میں کام کریں گے۔ اے سی آر رام بن، ایس ڈی ایم ، رامسو / بانہال / گول اور تمام تحصیلداران اپنے متعلقہ دائرہ اختیارات میں متعلقہ بی ایم اوز کی مشاورت سے مذکورہ مراکز کے لئے انتظامی کمیٹیوں کی تشکیل کریں گے۔ان سے کہا گیا کہ وہ ہر اس فرد کا موومنٹ رجسٹرقائم رکھیں جو داخلہ رکھنے والے افراد کو لوازمات / ادویات فراہم کرنے کے لئے کووڈ ہیلتھ سنٹر کا دورہ کریں گے اور کووڈ ہیلتھ سینٹرز میں موجود افراد کی عمومی بہبود کی نگرانی کریں گے اور متعلقہ افراد کو آگاہ کریں گے۔ان سے متعلقہ بی ایم اوز سے متعلقہ مراکز کے لئے اپنے متعلقہ فریم مینجمنٹ کمیٹیوں سے متعلق مشاورت کے لئے کہا گیا تھا۔ کمیٹیاں ہر اس فرد کا مووی رجسٹر برقرار رکھنے کو یقینی بنائے گی جو داخلوں میں داخل افراد کو لوازمات / ادویات فراہم کرنے کے لئے کوویڈ ہیلتھ سنٹر کا دورہ کرے۔
اے سی بی کی ٹیم پہنچی بھلیسہ
دیہی ترقی کے جونیئر انجینئر سمیت 4 ملازمین کی رہائش گاہوں پرچھاپے
اشتیاق ملک
ڈوڈہ //انٹی کوروپیش بیورو نے ڈوڈہ کے دیہی ترقی بلاک چنگا میں کام کر رہے ایک جونیئرانجینئرسمیت چار ملازمین کی رہائش گاہوں پر چھاپہ مارا اور ذرائع آمدنی سے متعلق تفصیلات حاصل کی۔ ذرائع کے مطابق ڈی ایس پی ساگر سنگھ کی قیادت میں اے سی بی کی ٹیموں نے بدھ کے روز ڈوڈہ کی سب ڈویڑن گندوہ میں واقع بلاک چنگا میں تعینات جونیئر انجینئر، وی ایل ڈبلیو و دو جی آر ایس کے گھروں پر الگ الگ کاروائی کے دوران کونہ کونہ چھان مارا۔اس دوران اے سی بی کی ٹیموں نے مذکورہ ملازمین کے پاس موجود آمدن کے بارے میں بھی تفصیلات حاصل کی۔ اس دوران اگر چہ کوئی گرفتاری عمل میں نہیں لائی گئی تاہم بتایا جاتا ہے کہ آنے والے دنوں میں اس قسم کی مزید کارروائی عمل میں لائی جائے گی۔واضح رہے کہ ڈوڈہ ضلع کے ہر بلاک میں محکمہ دیہی ترقی کے آفیسران و ملازمین پر رشوت ستانی کے الزامات پچھلے کئی برسوں سے لگے آرہے ہیں اور مقامی لوگ روزانہ سوشل میڈیا پر مالی بدعنوانی کے معاملات کو اچھال رہے ہیں لیکن تاحال کسی بھی آفیسر و ملازم کے خلاف کارروائی عمل میں نہیں لائی گئی ہے۔
ڈوڈہ جودھپور میں دھماکہ خیز مواد برآمد
اشتیاق ملک
ڈوڈہ //سیکورٹی فورسز و پولیس نے ایک مشترکہ کارروائی میں دھماکہ خیز مواد برآمد کیا ہے۔تفصیلات کے مطابق مصدقہ اطلاع ملنے پر جمعرات کو ساڑھے دس بجے کے قریب 10 راشٹریہ رائفلز، ایس ایس بی 7thبٹالین ،سی آر پی ایف ،ٹی اے و ایس اوجی کی ٹیم نے مشترکہ طور پر ڈوڈہ ہیڈکواٹر سے تقریباً بیس کلومیٹر کی دوری پر واقع گاؤں چوکین جودھپور میں تلاشی کاروائی شروع کی جس دوران جھاڑیوں میں سے دھماکہ دو پریشر ککر، ڈیٹونیٹر چار، پائپ بم دو، پلاسٹک بیٹری، آر ڈی ایکس چالیس کلو، پچاس میٹر تار، پنسل سیل چھ برآمد کیاتاہم اس سلسلے میں کوئی گرفتاری عمل میں نہیں لائی گئی ہے۔
دن بھر موسم ابر آلودرہا
شام کو تیز بارشوں سے سردی میں اضافہ
عاصف بٹ
کشتواڑ//ضلع کشتواڑ میں موسم کے بدلتے مزاج سے سردی کی شدت میں اضافہ ہوگیا ہے ۔جہاں جمعرات کو صبح دھوپ نکلی تو ن بھر موسم ابرآلود رہا وہیں شام ہوتے ہی بارشیں شروع ہوگئیں جسکے سبب سردی کی شدت میں مزید اضافہ ہوگیا۔ تفصیلات کے مطابق شام کو میدانی و بالائی علاقوں میں تیز بارشیں ہوئیں جسکے سبب عام زندگی متاثرہوگئی اور سردی کی شدت میں بھی کافی اضافہ ہوگیا جبکہ قصبہ میں جگہ جگہ پانی جمع ہوگیا جسے لوگوں کو سخت پریشانوں کا سامنا کرنا پڑا۔
