سرینگر //گذشتہ 24گھنٹوں کے دوران جموں و کشمیر کے 17اضلاع میں کسی کی رپورٹ مثبت نہیں آئی ہے۔ منگل کو جموں و کشمیر میں کورونا وائرس کی تشخیص کیلئے 23ہزار 456تشخیصی ٹیسٹ کئے گئے جن میں 3مسافروں سمیت مزید 7افراد کی رپورٹیں مثبت قرار دی گئی ہیں۔ متاثرین کی مجموعی تعداد 4لاکھ 53ہزار 569ہوگئی ہے۔ اس دوران مسلسل 9ویں دن بھی وائرس سے کسی کی موت نہیں ہوئی ہے۔ متوفین کی مجموعی تعداد 4750بنی ہوئی ہے۔ محکمہ صحت کی جانب سے فراہم کئے گئے اعداد وشمار کے مطابق جموں و کشمیر میں مزید 7افراد کی رپورٹیں مثبت آئیں ہیں جن میں جموں میں 2جبکہ کشمیر میں 5افراد کو مثبت قرار دیا گیا ہے۔ کشمیر صوبے کے 8اضلاع میں جن میں بڈگام، پلوامہ، اننت ناگ، کپوارہ، بانڈی پورہ، گاندربل، کولگام اور شوپیان میں کسی کی رپورٹ مثبت نہیں آئی ہیں جبکہ دیگر 2اضلاع میں 5افراد کی رپورٹیں مثبت آئیں جن میں سرینگر میں سب سے زیادہ 4جبکہ بارہمولہ میں ایک شخص کی رپورٹ مثبت آئی ہے۔ کشمیر میں متاثرین کی مجموعی تعداد 2 لاکھ 87ہزار ہوگئی ہے۔ اس دوران مسلسل 25ویں دن بھی وادی میں کورونا وائرس سے کسی کی موت نہیں ہوئی ہے ۔ متوفین کی مجموعی تعداد 2324بنی ہوئی ہے۔ جموں صوبے کے 9اضلاع جن میں ادھمپور، راجوری، پونچھ، کٹھوعہ، کشتواڑ، سانبہ، راجوری، رام بن اور ڈوڈہ میں کسی کی رپورٹ مثبت نہیں آئی ہے جبکہ جموں ضلع میں 2افراد کو مثبت قرار دیا گیا ہے۔ جموں ضلع کے دونوں متاثرین مقامی سطح پر رابطے میں آنے کی وجہ سے متاثر ہوئے ہیں۔ جموں صوبے میں متاثرین کی مجموعی تعداد 1لاکھ 66ہزار 230بنی ہوئی ہے۔ اس دوران جموں صوبے میں مسلسل 9ویں دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 2327بنی ہوئی ہے۔
۔17اضلاع میں صفر کورونا معاملات
