جموں//ریاست میں جموں اور بارہ مولہ پارلیمانی نشستوں کے لئے جمعرات کو ہوئی پہلے مرحلے کی ووٹنگ کے دوران پولنگ کی مجموعی شرح57.31 فیصد رہی۔چیف الیکٹورل افسر( سی ای او) شلیندر کمار نے ایک پریس کانفرنس کے دوران ذرائع ابلاغ کے نمائندوں کے ساتھ بات چیت کرتے ہوئے کہا کہ جموں پارلیمانی حلقہ4 اضلاع جموں۔،سانبہ، راجوری اور پونچھ پر محیط ہے اور اس میں اسمبلی نشستوں کی تعداد20 ہے۔انہوں نے کہا کہ اس پارلیمانی نشست میں کُل72.16 فیصد رائے دہندگان نے اپنی حق رائے دہی کا استعمال کیا۔بارہ مولہ پارلیمانی حلقہ کپواڑہ، بارہ مولہ اور بانڈی پورہ اضلاع پر مشتمل ہے اور اس پارلیمانی نشست میں15 اسمبلی نشستیں آتی ہیں۔انہوں نے کہا کہ پارلیمانی حلقہ میں مجموعی طور پر34.61 فیصد ووٹ ڈالے گئے جس میں سے کپواڑہ ضلع میں سب سے زیادہ51.7 فیصد ووٹنگ در ج کی گئی۔بارہمولہ نشست پر سب سے کم پولنگ کی شرح سوپور اسمبلی حلقے میں ہوئی جہاں 4.35فیصدووٹ ڈالے گئے ۔اس کے بعد رفیع آباد میں کم پولنگ کی شرح 11.76رہی۔سنگرامہ میں 13.70جبکہ بارہمولہ میں16.03پولنگ کی شرح رہی۔بانڈی پورہ میں 21.48کی شرح سے ووٹ ڈالے گئے۔ سب سے زیادہ پولنگ کی شرح ہندوارہ میں رہی جہاں60.27، کرناہ میں 59.10، کپوارہ میں 58.68، اوڑی میں57.01، لولاب میں 45.27، سوناواری میں41.34، گریز میں37.92، لنگیٹ میں35.52، پٹن میں33.89، گلمرگ میں33.48فیصد ووٹنگ ہوئی۔انہوں نے مزید کہا کہ سانبہ ضلع میں سب سے زیادہ75.07 فیصد ووٹنگ ہوئی ، اس کے بعد جموں ضلع میں74.50 فیصد ووٹ ڈالے گئے۔ علاوہ ازیں پونچھ اور راجوری اضلاع میں بالترتیب70.40 فیصد اور65.70 فیصد ووٹنگ درج کی گئی۔ انہوں نے کہا کہ ان دو حلقوں میں کُل33 اُمیدوار میدان میں ہیں جن میں سے24 اُمید وار جموں پارلیمانی حلقہ جبکہ9 اُمیدوار بارہ مولہ پارلیمانی حلقہ سے قسمت آزمائی کر رہے ہیں۔ انہوں نے کہا کہ پولنگ کا عمل 12 عام مشاہدین،8 اخراجاتی مبصرین اور7 پولیس مبصرین کی نگرانی میں منعقد ہوا۔ اس کے علاوہ462 مائیکرو ابزرورز اور7692 عملے کو ان دو نشستوں میں چناؤ کے دِن4489 پولنگ مراکز پر تعینات کیا گیا تھا۔مزید تفصیلات دیتے ہوئے سی ای او نے کہا کہ ان دو نشستوں میں ووٹروں کی کُل تعداد33 لاکھ سے زیادہ ہے جن میں17.16 لاکھ مرد اور16.80 لاکھ خواتین ووٹر شامل ہیں۔سی ای او نے ریاست میں احسن اور پُر امن انتخابات کو یقینی بنانے کے لئے ووٹروں، سیاسی جماعتوں، چناؤ لڑنے والے اُمیدواروں، پولنگ عملے اور حفاظتی دستوں کو مبارک باد دی ہے۔ ڈویثرنل کمشنر جموں سنجیو ورما، آئی جی پی جموں منیش کمار سنہا، ریٹرننگ افسر جموں پارلیمانی حلقہ رومیش کمار اور ایڈیشنل سی ای او راکیش کمار سرنگل بھی پریس کانفرنس میں موجود تھے۔
