پرویز احمد
سرینگر//جموں و کشمیر میں 7دنوں کے بعد کورونا وائرس متاثرین کی تعداد 500سے کم ہوگئی ہے۔ پچھلے 24گھنٹوں کے دوران جموں و کشمیر میں کورونا وائرس کی تشخیص کیلئے 9ہزار 136 ٹیسٹ کئے گئے جن میں 3مسافروں سمیت 452افراد کی رپورٹیں مثبت آئی ہیں۔ متاثرین کی مجموعی تعداد 4لاکھ 70ہزار کا ہندسہ پار کرکے 4لاکھ 70ہزار 452ہوگئی ہے۔ اس دوران جموں و کشمیر میں مسلسل تیسرے دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 4776بنی ہوئی ہے۔ محکمہ صحت کی جانب سے فراہم کئے گئے اعداد و شمار کے مطابق جموں و کشمیر میں کورونا وائرس سے 452افراد متاثر ہوئے ہیں جن میں جموں صوبے میں 94جبکہ کشمیر صوبے میں متاثر ہونے والے افراد کی تعداد 358ہے۔ کشمیر صوبے میں مثبت قرار دئے گئے سبھی 358افراد مقامی سطح پر رابطے میں آنے کی وجہ سے متاثر ہوئے ہیں ۔
کشمیر صوبے کے358افراد میں سرینگر میں 113، بارہمولہ میں سب سے زیادہ 143، بڈگام میں 13، پلوامہ میں 23، کپوارہ میں 23، اننت ناگ میں 9، بانڈی پورہ میں 6، گاندربل میں 10، کولگام میں 16 جبکہ شوپیان میں 2افراد کی رپورٹیں مثبت آئی ہیں۔ کشمیر صوبے میں متاثرین کی مجموعی تعداد 2لاکھ 97ہزار 578ہوگئی ہے۔ اس دوران وادی میں مسلسل تیسرے دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد2430بنی ہوئی ہے۔ جموں صوبے میں گذشتہ 24گھنٹوں کے دوران کورونا وائرس سے 94افراد متاثر ہوئے ہیں جن میں 3بیرون ریاستوں سے سفر کرکے واپس لوٹے جبکہ دیگر 91افراد مقامی سطح پر ربطے میں آنے کی وجہ سے متاثر ہوئے ہیں۔ جموں صوبے میں مثبت قرار دئے گئے 94افراد میں جموں ضلع میں 59، ادھمپور میں11، راجورہ میں3، ڈوڈہ میں2، کٹھوعہ میں6، سانبہ میں 6، پونچھ میں 1، رام بن میں 5، ریاسی میں 1 جبکہ کشتواڑ میں کسی کی رپورٹ مثبت نہیں آئی ہے۔ جموں صوبے میں متاثرین کی مجموعی تعداد 1لاکھ 72ہزار 578ہوگئی ہے۔ اس دوران جموں صوبے میں کورونا وائرس سے مسلسل تیسرے دن بھی کسی کی موت نہیں ہوئی ہے۔ متوفین کی مجموعی تعداد 2346بنی ہوئی ہے۔
