عظمیٰ نیوز سروس
نئی دہلی// ملک کے کئی حصوں میں 10، 20 اور 50 روپے کے نوٹوں کی شدید قلت پیدا ہوگئی ہے۔ آل انڈیا ریزرو بینک ایمپلائز ایسوسی ایشن (اے آئی آر بی ای اے)نے پیر کو سخت تشویش کا اظہار کرتے ہوئے کہا کہ اس کمی کی وجہ سے عام لوگوں کو روزانہ نقد لین دین کرنے میں خاصی مشکلات پیدا ہو رہی ہیں۔آل انڈیا ریزرو بینک ایمپلائز ایسوسی ایشن (اے آئی آر بی ای اے AIRBEA)نے اپنے خط میں کہا کہ چھوٹے نوٹ پورے ملک کے قصبوں، دیہاتوں اور نیم شہری علاقوں میں تقریبا نہ ہونے کے برابر ہیں۔ اس دوران 100، 200اور 500روپے کے نوٹ آسانی سے دستیاب ہیں۔ملازمین کی ایسوسی ایشن نے یہ خط ریزرو بینک آف انڈیا کے ڈپٹی گورنر ٹی ربی شنکر کو بھیجا ہے، جس میں کہا گیا ہے کہ اے ٹی ایم زیادہ تر اعلیٰ مالیت کے نوٹ بھیج رہے ہیں۔ اس سے مقامی نقل و حمل، گروسری کی خریداری اور روزمرہ کی ضروریات کے لیے نقد ادائیگی مشکل ہو گئی ہے۔بینک کی شاخیں بھی صارفین کو چھوٹے مالیت کے نوٹ فراہم کرنے سے قاصر ہیں۔ آل انڈیا ریزرو بینک ایمپلائز ایسوسی ایشن (اے آئی آر بی ای اے AIRBEA)کا کہنا ہے کہ ڈیجیٹل ادائیگیوں کے فروغ کے باوجود ملک کی ایک بڑی آبادی اب بھی نقد رقم پر انحصار کرتی ہے۔ نتیجتاً چھوٹے مالیت کے نوٹوں کی قلت روزمرہ کی زندگی میں مشکلات پیدا کر رہی ہے۔ملازمین کی یونین کا یہ بھی کہنا تھا کہ سکوں کے استعمال کو فروغ دینے کی کوششیں کی گئی تھیں لیکن یہ کوششیں خاطر خواہ سکے نہ ہونے کی وجہ سے ناکام ہو گئیں۔آل انڈیا ریزرو بینک ایمپلائز ایسوسی ایشن (اے آئی آر بی ای اے AIRBEA)نے مرکزی بینک سے فوری مداخلت کا مطالبہ کیا ہے۔ انہوں نے تجارتی بینکوں اور آر بی آئی کانٹرز کے ذریعے چھوٹے مالیت کے نوٹوں کی مناسب تقسیم کو یقینی بنانے کا مشورہ دیا۔ مزید برآں، انہوں نے سکے کے وسیع استعمال کو فروغ دینے کے لیے “سکے میلے” کو دوبارہ منظم کرنے کی سفارش کی۔ ملازمین کی یونین نے کہا کہ یہ میلے پنچایتوں، کوآپریٹیو، علاقائی دیہی بینکوں اور سیلف ہیلپ گروپس کے تعاون سے منعقد کیے جا سکتے ہیں۔ایسوسی ایشن نے نتیجہ اخذ کیا کہ چھوٹے نوٹوں کی یہ قلت عام لوگوں اور چھوٹے کاروباریوں کے لیے ایک سنگین مسئلہ بن گئی ہے۔ فوری کارروائی کے بغیر، نقد لین دین اور بھی مشکل ہو سکتا ہے۔
