عظمیٰ نیوز سروس
نئی دہلی// وزیرِ دفاع راج ناتھ سنگھ نے بدھ کو کہا کہ تقریباً چار دہائیاں قبل سری لنکا میں آپریشن پاون کے دوران بھارتی فوجیوں کی جانب سے دی گئی قربانیوں کا احترام کیا جانا چاہیے۔ انہوں نے بالواسطہ طور پر 1990 کی دہائی کی حکومتوں کو تنقید کا نشانہ بناتے ہوئے کہا کہ اس دور میں ان فوجیوں کی خدمات کو عوامی سطح پر وہ مقام نہیں دیا گیا جس کے وہ مستحق تھے۔انہوں نے کہا کہ نئی دہلی میں واقع نیشنل وار میموریل پر بھی آئی پی کے ایف کے امن دستوں کی خدمات کو تسلیم کیا جا رہا ہے۔وزیرِ دفاع نے اس عزم کا اعادہ کیا کہ ملک کی خدمت میں جان قربان کرنے والے ہر فوجی اور ویٹرن کی عزت و وقار کا تحفظ حکومت کی اجتماعی ذمہ داری ہے۔انہوں نے کہا کہ جہاں پہلے عالمی پلیٹ فارمز پر بھارت کو سنجیدگی سے نہیں لیا جاتا تھا، وہیں آج جب بھارت بولتا ہے تو دنیا توجہ سے سنتی ہے۔ قومی دارالحکومت کے مانیک شا سینٹر میں دسویں مسلح افواج کے سابق فوجیوں کے دن (آرمڈ فورسز ویٹرنز ڈے) کے موقع پر خطاب کرتے ہوئے انہوں نے سابق فوجیوں سے اپیل کی کہ وہ ملک کی رہنمائی جاری رکھیں اور سماجی ہم آہنگی کو فروغ دینے کی اہمیت پر زور دیا۔انہوں نے کہا، “آج بہت سے سابق فوجی تعلیم سے لے کر زراعت اور آفات کے انتظام تک ہر شعبے میں اپنا تعاون دے رہے ہیں۔ ہماری حکومت کا ماننا ہے کہ ہمارے فوجی اور سابق فوجی قوم کے اہم ستون ہیں۔ جس طرح گھریلو معاملات میں اہم فیصلے بزرگوں سے مشورے کے بعد کیے جاتے ہیں، اسی طرح آپ کا کردار بھی نہایت اہم ہے۔ ہماری حکومت نے سابق فوجیوں کے لیے کئی اقدامات کیے ہیں۔”انہوں نے آپریشن پاون کے دوران سری لنکا میں خدمات انجام دینے والے فوجیوں کو یاد کیا اور حکومت کے اقدامات پر روشنی ڈالی، جن میں ون رینک ون پنشن (او آر او پی) اسکیم شامل ہے، جو سابق فوجیوں کو مالی استحکام فراہم کرتی ہے۔ انہوں نے کہا، “میں ان فوجیوں کو بھی یاد کرنا چاہتا ہوں جنہوں نے انڈین پیس کیپنگ فورس کے حصے کے طور پر سری لنکا میں خدمات انجام دیں۔ اس دوران کئی فوجی شہید ہوئے۔ ان کی بہادری ہم سب کے لیے باعثِ تحریک ہونی چاہیے۔
معاشرے کی جانب سے سابق فوجیوں کو دیا جانے والا احترام ہمارا سماجی سرمایہ ہے۔ یہ فخر کی بات ہے کہ فوجیوں کے لیے احترام کسی حکم سے نہیں بلکہ ہماری روایت سے جڑا ہوا ہے۔” انہوں نے مزید کہا، “ہماری نوجوان نسل اس جذبے کو کھلے دل کے ساتھ آگے بڑھا رہی ہے۔ ہمارے نوجوانوں کو آپ سے سیکھنے کی ضرورت ہے۔ اگنی ویرس کو چاہیے کہ وہ آپ کی رہنمائی حاصل کریں اور ضرورت پڑنے پر سول انتظامیہ کے ساتھ کھڑے ہوں۔”
