غلام محمد
سوپور// بارہمولہ ضلع کے رفیع آباد کے گونی پورہ بابا گنڈ علاقے میں منگل کی دیر رات آگ لگنے کے ایک خوفناک واقعے میں ایک چوکیدار کی جان چلی گئی اور ایک ہارڈ ویئر کے گودام کو راکھ کا ڈھیر بنا دیا، جس سے کروڑوں روپے مالیت کی املاک کو نقصان پہنچا۔گونی پورہ بابا گنڈ رفیع آباد کے رہنے والے محمد اکبر بٹ ولد محمد مقبول بٹ کے ہارڈ ویئر کے گودام میں آگ رات دیر گئے بھڑک اٹھی اور تھوڑی ہی دیر میں پورے ڈھانچے کو لپیٹ میں لے لیا، جس سے بچانے کا بہت کم موقع رہ گیا۔اس واقعے میں ایک چوکیدار بشیر احمد پیر ولد غلام رسول پیر ساکن بابا گنڈ رفیع آبادجان کی بازی ہار گیا۔ ان کی موت سے پورے علاقے میں صدمے کی لہر دوڑ گئی ہے، مکینوں نے اس نقصان پر گہرے دکھ کا اظہار کیا ہے۔حکام نے آگ لگنے کی اصل وجہ جاننے کے لیے تحقیقات شروع کر دی ہیں۔
