یو این آئی
ہیوسٹن/ڈی آر کانگو نے حیرت انگیز کارکردگی کا مظاہرہ کرتے ہوئے بدھ کے روز فٹ بال ورلڈ کپ کے گروپ ‘کے ‘ مقابلے میں مضبوط دعویدار پرتگال کو 1-1 سے ڈرا پر روک کر ایک پوائنٹ چھین لیا۔رابرٹو مارٹنیز کی کوچنگ میں پرتگال کی ٹیم بڑی امیدوں کے ساتھ ٹورنامنٹ میں اتری تھی، جس میں کرسٹیانو رونالڈو، برونو فرنینڈس اور برنارڈو سلوا جیسے عالمی معیار کے کھلاڑی شامل ہیں۔ لیکن میچ پر غلبہ حاصل کرنے کے باوجود وہ ڈی آر کانگو کے دفاع کو عبور نہ کر سکے ۔دوسری طرف، ڈی آر کانگو 1974 کے بعد پہلی بار ورلڈ کپ میں حصہ لے رہا تھا اور اس نے پہلے ہاف کے اختتام سے عین قبل اپنا پہلا گول کر کے تاریخ رقم کر دی۔ ڈی آر کانگو نے اپنے مضبوط دفاع پر بھروسہ کرتے ہوئے پرتگال کو برابر روکے رکھا۔ پرتگال نے پہلا گول کیا۔
جواؤ نیوس کے بروقت لگائے گئے ہیڈر سے پرتگال نے برتری حاصل کی۔ نیٹونے بائیں جانب سے شاندار پاس دیا اور باکس کے اندر نیوس کو خالی جگہ ملی؛ انہوں نے بہت سمجھداری سے گول کیا اور گیند کو گول کیپر کی پہنچ سے دور رکھا۔ کانگو نے پہلے ہاف کے انجری ٹائم میں برابری کا گول داغا۔ یہ ان کا پہلا ورلڈ کپ گول تھا۔ پرتگال حیران رہ گیا۔ یون ویسا نے ہیڈر سے گول کیا اور اسٹینڈز میں موجود شائقین خوشی سے جھوم اٹھے۔ دوسرے ہاف میں پرتگال نے کافی کوشش کی لیکن اسے فاتح گول نہ مل سکا۔ رونالڈو واضح مواقع نہ بنا سکے اور جو ایک دو مواقع ملے اس کا فائدہ نہ اٹھا سکے ۔ رونالڈو خود بھی مایوسی میں اپنا سر ہلاتے نظر آئے ۔آخری سیٹی بجنے پر ڈی آر کانگو کے حامی خوشی سے جھوم اٹھے ۔ ان کی ٹیم نے وہ کام کر دکھایا جس کی کسی کو امید نہیں تھی۔ پرتگال کو ڈرا پر روک کر ڈی آر کانگو نے ورلڈ کپ میں ایک بڑا اپ سیٹ کر دیا۔
