عظمیٰ نیوزسروس
ریاسی//ڈپٹی کمشنر ریاسی کمار ابھیشیک نے ایک کثیر موضوعی آگاہی ریلی کو روانہ کیا، جو تین روزہ جامع آگاہی پروگرام کا حصہ ہے۔ اس پروگرام کا مقصد عوام خصوصاً نوجوانوں کو اہم سماجی اور ترقیاتی موضوعات جیسے ذہنی صحت، منشیات سے نجات، کیریئر رہنمائی، ٹریفک قوانین سے آگاہی اور ماحولیاتی تحفظ کے بارے میں شعور دینا ہے۔ریلی ڈپٹی کمشنر آفس کمپلیکس سے شروع ہو کر مرکزی بس سٹینڈ اور ملحقہ بازاروں سے گزرتی ہوئی دوبارہ اسی مقام پر اختتام پذیر ہوئی۔ مختلف تعلیمی اداروں کے طلبہ نے بڑی تعداد میں شرکت کی۔ انہوں نے پلے کارڈز اٹھا رکھے تھے اور نعرے لگاتے ہوئے عوام میں صحت مند طرزِ زندگی، ذمہ دارانہ رویے، ٹریفک قوانین کی پابندی اور ماحولیاتی تحفظ کے پیغامات عام کیے۔اس موقع پر ڈپٹی کمشنر نے کہا کہ آگاہی پروگرام ایک ذمہ دار اور باخبر معاشرے کی تشکیل میں اہم کردار ادا کرتے ہیں۔ انہوں نے کہا کہ طلبہ مؤثر تبدیلی لانے والے کردار ہیں جو اپنی معلومات اور مثبت رویے کے ذریعے اپنے خاندانوں اور معاشرے پر اثر ڈال سکتے ہیں۔انہوں نے نوجوانوں کو مشورہ دیا کہ وہ اپنی تعلیم پر توجہ دیں، نظم و ضبط والی زندگی اپنائیں اور ملک کی تعمیر و ترقی میں فعال کردار ادا کریں۔ انہوں نے یہ بھی کہا کہ نوجوان منشیات سے دور رہیں کیونکہ یہ نہ صرف فرد کی صحت بلکہ پورے معاشرے کو متاثر کرتی ہے۔ڈپٹی کمشنر نے شرکاء پر زور دیا کہ وہ ٹریفک قوانین کی سختی سے پابندی کریں اور صاف ستھرا و سرسبز ماحول قائم رکھنے میں اپنا کردار ادا کریں۔ انہوں نے کہا کہ انتظامیہ اس طرح کے آگاہی پروگرام آئندہ بھی جاری رکھے گی تاکہ عوام میں ذمہ دارانہ شہری شعور کو فروغ دیا جا سکے۔
منشیات مخالف تین روزہ مہم راجوری میں اختتام پذیر
عظمیٰ نیوز سروس
راجوری//نوجوان نسل اور معاشرے کو درپیش سنگین سماجی چیلنجز کے حوالے سے بیدار کرنے کی غرض سے جموں و کشمیر اسکول ایجوکیشن ڈیپارٹمنٹ کی جانب سے سرحدی ضلع راجوری میں تین روزہ آگاہی مہم کا انعقاد کیا گیا۔اس مہم کے دوران منشیات کی لت اور اس سے جڑے مسائل، ماحولیاتی آلودگی اور دیگر سماجی برائیوں جیسے اہم موضوعات پر توجہ مرکوز کی گئی۔ اس سلسلے میں مختلف اسکولوں میں متعدد آگاہی پروگرامز اور سرگرمیوں کا انعقاد کیا گیا تاکہ طلبہ کو تعلیم دی جا سکے اور انہیں اپنی کمیونٹی میں مثبت تبدیلی کے سفیر کے طور پر تیار کیا جا سکے۔مہم کے آخری روز جمعہ کو ایک بڑی آگاہی ریلی کا انعقاد کیا گیا، جسے ایم ایل اے راجوری افتخار احمداور ایم ایل اے تھنہ منڈی مظفر اقبا ل خان نے سینئرسرکاری افسران کی موجودگی میں جھنڈی دکھا کر روانہ کیا۔یہ ریلی ڈاک بنگلہ راجوری سے شروع ہوئی اور شہر کے مرکزی بازاروں سے گزری، جس میں سینکڑوں طلبہ نے جوش و خروش کے ساتھ شرکت کی۔ طلبہ نے پلے کارڈز اٹھا رکھے تھے اور منشیات اور دیگر سماجی برائیوں کے خلاف نعرے بازی کی۔حکام کے مطابق اس مہم کا بنیادی مقصد عوام، خاص طور پر سرحدی علاقوں میں رہنے والے لوگوں کو منشیات کے بڑھتے ہوئے خطرے سے آگاہ کرنا تھا۔ انہوں نے لائن آف کنٹرول (ایل او سی) کے پار سے منشیات کی اسمگلنگ میں اضافے پر بھی تشویش ظاہر کی، جس نے علاقے میں اس مسئلے کو مزید سنگین بنا دیا ہے۔مہم کا اختتام طلبہ اور حکام کی جانب سے اس عزم کے ساتھ ہوا کہ وہ مل کر ایک منشیات سے پاک اور باشعور معاشرے کی تعمیر کیلئے کام کریں
پونچھ میں تین روزہ آگاہی پروگرام کا عوامی بیداری ریلی کے ساتھ اختتام
محتشم احتشام
پونچھ//محکمۂ تعلیم پونچھ کے زیرِ اہتمام منعقدہ تین روزہ ضلعی سطح کے جامع آگاہی پروگرام کا اختتام ایک پُرجوش اور بامقصد عوامی بیداری ریلی کے ساتھ ہوا، جس نے شہر بھر میں شعور و ذمہ داری کا ایک مثبت پیغام عام کیا۔یہ پروگرام معاشرتی اصلاح اور نوجوان نسل میں مثبت رجحانات کو فروغ دینے کے عزم کے تحت ترتیب دیا گیا تھا، جس میں ٹریفک آگاہی، ذہنی صحت، انسدادِ منشیات، کیریئر کونسلنگ اور ماحولیاتی تحفظ جیسے نہایت اہم موضوعات کو مرکزِ نگاہ بنایا گیا۔ریلی کا آغاز گورنمنٹ گرلز ہائر سیکنڈری اسکول شیش محل پونچھ سے ہوا اور یہ شہر کی مختلف شاہراہوں اور اہم مقامات سے گزرتی ہوئی عوام الناس تک اپنا پیغام پہنچاتی رہی، بعد ازاں اسی مقام پر اختتام پذیر ہوئی۔ اس موقع پر فضا میں طلبہ کے پُرجوش نعروں اور بامقصد پیغامات کی گونج سنائی دیتی رہی، جس نے شہریوں کی توجہ اپنی جانب مبذول کرائی۔ریلی میں ضلع بھر کے مختلف تعلیمی اداروں سے تعلق رکھنے والے تقریباً 750 طلبہ و طالبات نے بھرپور شرکت کی۔ شرکاء نے اپنے ہاتھوں میں معلوماتی بینرز اور تخلیقی پوسٹرز اٹھا رکھے تھے، جن پر معاشرتی برائیوں کے خاتمے اور مثبت طرزِ زندگی کے فروغ کے پیغامات درج تھے۔طلبہ کی والہانہ شرکت اس امر کی عکاس تھی کہ نئی نسل نہ صرف مسائل سے آگاہ ہے بلکہ ان کے حل کے لیے عملی کردار ادا کرنے کے لیے بھی پُرعزم ہے۔
