ڈائریکٹرباغبانی جموں کا ڈوڈہ کا وسیع دورہ

ڈوڈہ//ڈائریکٹر ہارٹیکلچر جموں رام ساواک نے اتوار کو ڈوڈہ ضلع کا ایک وسیع دورہ کیا۔دورے کے دوران انہوں نے چیف ہارٹیکلچر آفیسر ڈوڈا آر کے کوتوال، ڈسٹرکٹ ہارٹیکلچر آفیسر شکیل احمد، ایم سی سی بی بی پنگوترا، ایچ ڈی اوز، اور پی آر آئی ممبران کی موجودگی میںضلع ڈوڈہ میں پائروٹ اور عسر میں ہائی ڈینسٹی لیموں پودا لگا کر شجر کاری مہم کا آغاز کیا۔شجر کاری مہم جموں ڈویژن کے تمام اضلاع میں شروع کی گئی ہے جس کا رقبہ 60 ہیکٹر ہے۔ڈائریکٹر ہارٹیکلچر جموں نے بی ڈی سی چیئرپرسن عسرسلکشنا دیوی، بی ڈی سی چیئر پرسن کاستی گڑھ عبدالغنی بٹ، سی ایچ او ڈوڈہ، سرپنچوں، پنچوں اور محکمہ کے دیگر افسران و اہلکاروں کی موجودگی میں عسر کے رام گھر میں ایک میگا بیداری کیمپ کا بھی افتتاح کیاجس میں خواتین سمیت 200 کسانوں نے شرکت کی۔کاشتکاروں سے خطاب کرتے ہوئے ڈائریکٹر نے محکمہ کی مرکزی سپانسر شدہ مختلف سکیموں کے فوائد کی وضاحت کی اور ان پر زور دیا کہ وہ آگے آئیں، محکمہ باغبانی کے ساتھ منسلک ہوں اور مختلف اجزاء پر مراعات حاصل کریں جیسے بور ویل، واٹر ہارویسٹنگ ٹینک، ڈرپ اریگیشن، کسٹم ہائرنگ سینٹرز،ورمی کمپوسٹ یونٹس، محفوظ کاشت کاری، اسٹرابیری کے پودے لگانے، ان کی سماجی و اقتصادی حیثیت کو بڑھانے کے لیے اوزار اور آلات وغیرہ۔ انہوں نے کہا کہ ضلع میں باغبانی کی فصلوں کی بڑی صلاحیت موجود ہے جس سے فائدہ اٹھانا ضروری ہے اور انہوں نے پی آر آئی اور فیلڈ افسران سے اپیل کی کہ وہ رقبہ کی توسیع، سولر ڈرائر اور پروسیسنگ یونٹس کے قیام پر خصوصی توجہ کے ساتھ کسانوں کی آمدنی کو دوگنا کرنے کے لیے مل کر کام کریں۔دریں اثنا، ڈائریکٹر زراعت جموں کے کے شرما نے CHO جموں، ایس سربجیت سنگھ، ڈی ایل ایس ایم ایس سنجیو کمار اور سندیپ گپتا اور کی موجودگی میں کڈیال برہمنا آر ایس پورہ میں ہائی ڈینسٹی لیموں کے پودے کا پودا لگا کر ضلع جموں میں شجرکاری مہم کا آغاز کیا۔ انہوں نے کسانوں پر زور دیا کہ وہ اپنے کھیتوں میں مربوط کھیتی کو اپنائیں اور اپنی آمدنی میں اضافہ کریں۔سی ایچ او جموں ایس سربجیت سنگھ اور سی ایچ او ڈوڈا آر کے کوتوال نے کسانوں سے کہا کہ وہ مختلف سکیموں کے فوائد حاصل کرنے کے لیے آگے آئیں اور پھلوں کی فصلوں کی پیداوار سے متعلق کسانوں کے تکنیکی مسائل کو بھی حل کیا۔