عشرت حسین بٹ
منڈی// ضلع پونچھ کی تحصیل منڈی کے علاقے چکترو میں جمعرات علی الصبح ایک افسوسناک سڑک حادثہ پیش آیا جس میں ایک مسافر گاڑی حادثے کا شکار ہو گئی۔ اس حادثے کے نتیجے میں گاڑی میں سوار دس افراد زخمی ہو گئے جنہیں فوری طور پر مقامی لوگوں اور پولیس کی مدد سے ضلع ہسپتال پونچھ منتقل کیا گیا، جہاں ابتدائی علاج کے بعد ان تمام کو گھروں کو واپس بھیج دیا گیا۔ذرائع کے مطابق حادثہ اس وقت پیش آیا جب مسافر گاڑی، جس کا رجسٹریشن نمبر JK-12-1245 ہے، منڈی سے پونچھ کی جانب رواں دواں تھی۔ جیسے ہی گاڑی چکترو کے قریب پہنچی تو اچانک ڈرائیور کا کنٹرول ختم ہو گیا اور گاڑی سڑک سے پھسل کر حادثے کا شکار ہو گئی۔ واقعے کے فوراً بعد علاقے کے لوگوں نے انسانی ہمدردی کا مظاہرہ کرتے ہوئے زخمیوں کو گاڑی سے باہر نکالا اور پولیس کو اطلاع دی۔ پولیس ٹیم نے موقع پر پہنچ کر امدادی کارروائی شروع کی اور تمام زخمیوں کو ایمبولینس کے ذریعے ضلع ہسپتال پونچھ پہنچایا گیا۔ٹریفک پولیس ذرائع نے بتایا کہ ابتدائی تحقیقات کے مطابق حادثہ تیز رفتاری یا سڑک کی خراب حالت کے باعث پیش آیا ہو سکتا ہے، تاہم اصل وجوہات جاننے کے لئے تفصیلی جانچ کی جا رہی ہے۔ پولیس نے اس سلسلے میں کیس درج کر لیا ہے اور ڈرائیور سے بھی پوچھ گچھ کی جا رہی ہے تاکہ یہ معلوم کیا جا سکے کہ حادثہ کن حالات میں پیش آیا۔ادھر ضلع ہسپتال پونچھ کے میڈیکل سپرنٹنڈنٹ ڈاکٹر محمد شفیق نے بتایا کہ حادثے کے بعد دس زخمی مسافروں کو ہسپتال لایا گیا تھا جہاں تمام افراد کو فوری طبی امداد فراہم کی گئی۔ انہوں نے کہا کہ خوش قسمتی سے کسی کی حالت تشویشناک نہیں تھی اور بروقت علاج کی وجہ سے تمام زخمیوں کی حالت بہتر ہو گئی، جس کے بعد انہیں اپنے اپنے گھروں کو روانہ کر دیا گیا۔واقعے کے بعد علاقے میں کچھ دیر کے لئے افرا تفری کی کیفیت رہی، تاہم پولیس اور انتظامیہ کی بروقت کارروائی سے صورتحال جلد قابو میں آ گئی۔ مقامی لوگوں نے انتظامیہ سے مطالبہ کیا ہے کہ اس سڑک پر حفاظتی اقدامات کو مزید بہتر بنایا جائے، کیونکہ یہ علاقہ پہلے بھی کئی حادثات کا گواہ رہ چکا ہے۔ شہریوں کا کہنا ہے کہ تیز رفتاری، سڑک کی خستہ حالی اور مناسب سائن بورڈز کی کمی آئے دن حادثات کا سبب بن رہی ہے، جس پر فوری توجہ دینا وقت کی اہم ضرورت ہے۔
