پہلا ٹیسٹ:پاکستان فالوآن بچانے میں کامیاب،کیویز کو 192رن کی برتری حاصل

ماؤنٹ منگنوئی /پاکستان اور نیوزی لینڈ کے درمیان کھیلے جارہے پہلے ٹیسٹ میچ میں پاکستانی ٹیم نیوزی لینڈ کے 431رنز کے مقابلے میں پہلی اننگز میں 239رنز بنا کر آؤٹ ہوگئی اور یوں کیوی ٹیم کو 192رنز کی برتری حاصل ہوگئی ہے۔ماؤنٹ منگنوئی میں کھیلے جارہے سیریز کے پہلے ٹیسٹ میچ کے تیسرے روز پاکستانی ٹیم نے اپنی پہلی اننگ 30 رنز ایک کھلاڑی آؤٹ پر دوبارہ شروع کی تو 39 کے مجموعی اسکور پر اوپنر عابد علی 25 رنز بنا کر بولڈ ہوگئے۔جس کے بعد صرف 3 رنز کے اضافے سے ایک اور وکٹ کر گئی اور اس بار محمد عباس بولٹ کی گیند کا شکار بنے۔43 پر 3 وکٹ گنوا دینے کے بعد ٹیم کو سینئر بلے باز اظہر علی سے امید تھی تاہم وہ بھی کوئی خاطر خواہ کارکردگی نہ دکھا سکے اور 43 ویں اوور میں 51 کے مجموعی اسکور پر صرف 5 رنز بنا کر آؤٹ ہوگئے۔اس کے ایک رن بعد ہی پاکستان کی اگلی وکٹ 52 کے مجموعی اسکور پر گری اور حارث سہیل صرف 3 رنز بنا کر پویلین لوگ گئے۔نیوز لینڈ کے 431رنز کے جواب میں پہلی اننگ میں 52 پر آدھی ٹیم کے آؤٹ ہونے سے پاکستانی ٹیم پر فالو آن کا خطرہ منڈلانے لگا، جس کے بعد کپتان محمد رضوان اور فواد عالم نے محتاط انداز میں بیٹنگ کی اور ٹیم کا اسکور آگے بڑھایا۔60 ویں اوور میں جب ٹیم کا اسکور آہستہ آہستہ 80 رنز تک پہنچا تھا تو فواد عالم، کپتان کا ساتھ چھوڑ بیٹھے اور 9 رنز بنا کر کیچ آؤٹ ہوگئے۔محمد رضوان کا ساتھ دینے کے لیے اگلے آنے والے کھلاڑی فہیم اشرف تھے اور ان دونوں کے درمیان 107 رنز کی شراکت داری قائم ہوئی۔تاہم جب ٹیم کا مجموعی اسکور 187 رنز پر پہنچا تو سیٹ بلے باز کپتان محمد رضوان 71 رنز بنا کر رن آؤٹ ہوگئے۔جس کے بعد اگلے آؤٹ ہونے والے کھلاڑی یاسر شاہ تھے جو صرف 4 رنز بنا سکے، 196 پر 8 وکٹیں گرنے کے بعد اگلے آنے والے کھلاڑی شاہین شاہ آفریدی تھے، جنہوں نے فہیم اشرف کے ساتھ اسکور کو آگے بڑھایا۔فہیم اشرف نے نہ صرف ذمہ دارانہ بیٹنگ کی بلکہ وہ ٹیم کو فالو آن سے بچانے میں بھی کامیاب رہے، تاہم دوسرے اینڈ پر موجود شاہین شاہ آفریدی زیادہ دیر تک ان کا ساتھ نہ دے سکے اور 235 کے مجموعی اسکور پر وکٹ گنوا بیٹھے۔ان کے بعد فہیم اشرف بھی مجموعی اسکور میں صرف 4 رنز کا مزید اضافہ کرسکے اور 239 کے مجموعی اسکور پر 91 رنز بنا کر آؤٹ ہوگئے۔پاکستانی ٹیم کی جانب سے پہلی اننگز میں فہیم اشرف نے 91اور محمد رضوان نے 71رنز بنائے جبکہ ان کے سوا باقی ٹیم کوئی خاطر خواہ کارکردگی نہ دکھا سکی۔کیویز کی جانب سے کیل جمیسن نے 3کھلاڑیوں کا شکار کیا جبکہ ٹم ساؤتھی، ٹرینٹ بولٹ اور نیل واگنر کے حصے میں 2، 2وکٹیں آئیں۔واضح رہے کہ میچ کے تیسرے روز بارش نے بھی کھیل میں خلل ڈالا اور 2 سے 3 مرتبہ بارش کے باعث کھیل کو روکنا بھی پڑا۔اس سے قبل میچ کے دوسرے روز کیویز نے اپنی پہلی اننگ میں کپتان ولیمسن کے 129رنز کی بدولت 431رنز بنائے تھے۔کیویز کی جانب سے روس ٹیلر 70، واٹلنگ 73اور ہینری نکولس 56رنز بنا کر نمایاں رہے تھے جبکہ پاکستان کی جانب سے شاہین شاہ آفریدی نے پہلی اننگ میں 4کیوی کھلاڑیوں کا شکار کیا تھا۔اسپنر یاسر شاہ کے حصے میں 3 جبکہ محمد عباس، فہیم اشرف اور نسیم شاہ کے حصے میں ایک، ایک وکٹ آئی تھی۔