محتشم احتشام
پونچھ//جموں و کشمیر کے لیے ایک بڑے اعزاز اور فخر کے لمحے میں مرکز کے دو نوجوان والی بال کھلاڑیوں، ناصر اعجاز صوفی (ضلع بارہمولہ) اور ریحان پرویز (ضلع پونچھ) نے قومی سطح پر اپنی صلاحیتوں کا لوہا منواتے ہوئے بھارت کے انڈر-17 بوائز نیشنل والی بال کوچنگ کیمپ 2026 کے لیے منتخب ہونے والے 26 بہترین کھلاڑیوں میں جگہ بنا لی ہے۔ ان کی کامیابی کو جموں و کشمیر میں والی بال کے فروغ اور نوجوان کھلاڑیوں کے روشن مستقبل کی علامت قرار دیا جا رہا ہے۔یہ انتخاب گزشتہ ماہ 28 اور 29 مئی کو احمد آباد، گجرات میں منعقدہ قومی سلیکشن ٹرائلز کے بعد عمل میں آیا، جہاں ملک بھر سے تعلق رکھنے والے 173 باصلاحیت کھلاڑیوں نے شرکت کی۔ والی بال فیڈریشن آف انڈیا (VFI) کی اسٹیئرنگ کمیٹی کی نگرانی میں منعقدہ ان ٹرائلز کا مقصد مستقبل کے قومی اور بین الاقوامی مقابلوں کے لیے بہترین ٹیلنٹ کی نشاندہی کرنا تھا۔سلیکشن کے پہلے مرحلے میں کھلاڑیوں کی جسمانی استعداد، فٹنس اور ایتھلیٹک صلاحیتوں کا جائزہ لیا گیا، جبکہ بعد ازاں تکنیکی مہارتوں کی جانچ کے لیے خصوصی اسکل ٹیسٹ منعقد کیے گئے۔
دوسرے روز کھلاڑیوں کو مختلف گروپس میں تقسیم کرکے میچ سیشنز کرائے گئے، جن کے ذریعے ان کی کھیل فہمی، ٹیم ورک اور مجموعی کارکردگی کا تفصیلی جائزہ لیا گیا۔دو روزہ سخت اور شفاف انتخابی عمل کے بعد سلیکشن کمیٹی نے ملک کے 26 نمایاں کھلاڑیوں کو قومی کوچنگ کیمپ کے لیے منتخب کیا، جن میں جموں و کشمیر کے ناصر اعجاز صوفی اور ریحان پرویز کی شمولیت خصوصی توجہ کا مرکز بنی۔کھیل حلقوں کا کہنا ہے کہ دونوں نوجوان کھلاڑیوں کی کامیابی نہ صرف ان کی ذاتی محنت کا ثمر ہے بلکہ جموں و کشمیر میں والی بال کے بڑھتے ہوئے معیار اور کھیلوں کے فروغ کی بھی عکاس ہے۔ قومی کوچنگ کیمپ میں شرکت کے دوران یہ کھلاڑی آنے والے قومی و بین الاقوامی مقابلوں کے لیے خصوصی تربیت حاصل کریں گے۔دریں اثنا، والی بال ایسوسی ایشن آف جموں و کشمیر (VAJK) کے سرپرستِ اعلیٰ راج دلوجہ، صدر سدھارتھ دلوجہ، سابق سی ای او کلدیپ مگوترہ اور خزانچی محمد طارق سمیت دیگر عہدیداران نے دونوں کھلاڑیوں کو دلی مبارکباد پیش کرتے ہوئے امید ظاہر کی کہ وہ اپنی صلاحیتوں کے بل بوتے پر نہ صرف جموں و کشمیر بلکہ پورے ملک کا نام روشن کریں گے۔ کھیل شائقین اور والی بال برادری نے بھی اس کامیابی کا خیرمقدم کرتے ہوئے اسے خطے کے نوجوانوں کے لیے ایک حوصلہ افزا مثال قرار دیا ہے۔
