محتشم احتشام
پونچھ//ضلع پونچھ کے قلب میں واقع پرانی پونچھ چوک پر سکھ نوجوانوں نے ایک پْراثر اور انسان دوست اقدام کے تحت دودھ کی سبیل قائم کر کے گرو گوبند سنگھ جی کے چار صاحبزادوں کی عظیم قربانیوں کو شاندار خراجِ تحسین پیش کیا۔ اس موقع پر نوجوانوں نے رضاکارانہ طور پر راہگیروں، مسافروں اور مقامی شہریوں میں میٹھا دودھ تقسیم کیا، جس سے علاقے میں اخوت، رواداری اور خدمتِ خلق کی خوبصورت مثال قائم ہوئی۔تقریب کے دوران نوجوانوں نے حاضرین کو صاحبزادوں کی لازوال قربانیوں کے تاریخی پس منظر سے بھی آگاہ کیا اور بتایا کہ یہ قربانیاں حق، سچائی اور مذہبی آزادی کے تحفظ کے لئے دی گئیں۔ شرکاء نے کہا کہ دودھ کی سبیل کا مقصد محض تقسیم نہیں بلکہ نئی نسل تک قربانی، صبر اور انسان دوستی کا پیغام پہنچانا ہے، تاکہ معاشرے میں اخلاقی اقدار مضبوط ہوں۔پرانی پونچھ چوک پر یہ منظر قابلِ دید تھا کہ مختلف مذاہب اور طبقات سے تعلق رکھنے والے افراد ایک ہی جگہ جمع ہو کر اس خدمت میں شریک ہوئے۔شہریوں نے سکھ نوجوانوں کے جذبے کو سراہتے ہوئے کہا کہ اس طرح کے اقدامات فرقہ وارانہ ہم آہنگی کو فروغ دیتے ہیں اور پونچھ کی مشترکہ تہذیب و ثقافت کی عکاسی کرتے ہیں۔نوجوانوں نے اس عزم کا اظہار کیا کہ آئندہ بھی وہ اسی جذبے کے تحت سماجی اور فلاحی سرگرمیوں کو جاری رکھیں گے اور گرو گوبند سنگھ جی کے صاحبزادوں کی تعلیمات—جرت، ایثار اور خدمت کو عملی شکل دیتے رہیں گے۔ مقامی معززین نے اس اقدام کو قابلِ تقلید قرار دیتے ہوئے کہا کہ ایسی سرگرمیاں نوجوانوں کو مثبت راستے پر گامزن کرتی ہیں اور معاشرے میں امن و بھائی چارے کو مستحکم کرتی ہیں۔یہ تقریب نہ صرف ایک یادگار خراجِ عقیدت ثابت ہوئی بلکہ پونچھ میں مذہبی رواداری اور انسانی خدمت کے روشن پیغام کو مزید تقویت دینے کا باعث بھی بنی۔
