سمت بھارگو
راجوری//حکام نے بدھ کے روز انکشاف کیا کہ جموں و کشمیر کے سرحدی ضلع پونچھ میں لائن آف کنٹرول (ایل او سی) کے اْس پار سے دہشت گردی کو ہوا دے کر امن و امان کی صورتحال کو خراب کرنے کی مسلسل کوششیں کی جا رہی ہیں تاہم سیکورٹی فورسز ان ناپاک عزائم کو مؤثر انداز میں ناکام بنا رہی ہیں۔ حکام کے مطابق پونچھ میں دہشت گردی کے نیٹ ورک کو مضبوط کرنے کی کوششیں پاکستان کے زیر قبضہ جموں و کشمیر (پی او جے کے) سے کی جا رہی ہیں۔اس معاملے پر بات کرتے ہوئے حکام نے بتایا کہ پہلے مرحلے میں پونچھ سے تعلق رکھنے والے تقریباً ڈیڑھ درجن افراد کی نشاندہی کی گئی تھی، جو پی او جے کے میں بیٹھ کر ضلع میں دہشت گردی پھیلانے کی سازشوں میں ملوث تھے تاہم، بعد میں پولیس اور سیکورٹی ایجنسیوں کی جانب سے چلائی گئی ایک جامع اور منظم تصدیقی مہم کے بعد یہ تعداد کہیں زیادہ سامنے آئی ہے۔حکام کے مطابق تازہ تصدیقی مہم کے دوران پولیس نے مجموعی طور پر 306 ایسے افراد کی شناخت کی ہے، جو اصل میں پونچھ سے تعلق رکھتے ہیں اور اس وقت پی او جے کے میں مقیم ہیں۔ بتایا گیا ہے کہ یہ تمام افراد کسی نہ کسی شکل میں ضلع پونچھ میں دہشت گردی کو فروغ دینے، نوجوانوں کو گمراہ کرنے اور سرحد پار سے تشدد آمیز سرگرمیوں کو تقویت دینے کی کوششوں میں سرگرم ہیں۔حکام نے کہا کہ ان عناصر کی سرگرمیوں پر کڑی نظر رکھی جا رہی ہے اور سیکورٹی فورسز نے پورے ضلع میں الرٹنس کی سطح انتہائی بلند کر رکھی ہے۔
انہوں نے مزید کہا کہ مسلسل انسدادِ دہشت گردی آپریشنز، انٹیلی جنس پر مبنی کارروائیوں اور دیگر سیکورٹی اقدامات کے ذریعے ان افراد کی کوششوں کو ناکام بنایا جا رہا ہے۔پولیس کے مطابق دہشت گردی سے وابستہ ایسے عناصر کے خلاف سخت کارروائی عمل میں لائی جا رہی ہے، جن میں ان کی جائیدادوں کو ضبط کرنا اور قانونی دائرے میں لا کر سزا دلانا شامل ہے۔ حکام نے کہا کہ کئی ایسے ملزمان کی جائیدادیں منسلک (اٹیچ) کی جا چکی ہیں، جبکہ دیگر کے خلاف بھی قانونی کارروائی کا عمل جاری ہے۔حکام کا کہنا ہے کہ یہ تمام اقدامات ایک وسیع تر حکمتِ عملی کا حصہ ہیں، جس کا مقصد سرحدی ضلع پونچھ میں دہشت گردی کے پورے نیٹ ورک کو جڑ سے اکھاڑ پھینکنا ہے۔ اس حکمتِ عملی کے تحت نہ صرف دہشت گردوں بلکہ ان کے سہولت کاروں، ہمدردوں اور مالی معاونت فراہم کرنے والوں کو بھی نشانہ بنایا جا رہا ہے۔انہوں نے واضح کیا کہ ضلع پونچھ میں امن و امان کی بحالی اور عوام کی جان و مال کے تحفظ کے لئے کسی بھی قسم کی نرمی نہیں برتی جائے گی۔ سیکورٹی فورسز اور پولیس باہمی تال میل سے کام کر رہی ہیں تاکہ سرحد پار سے ہونے والی کسی بھی دراندازی یا تخریبی سرگرمی کو بروقت روکا جا سکے۔حکام نے عوام سے بھی اپیل کی کہ وہ مشکوک سرگرمیوں کی اطلاع فوری طور پر پولیس یا سیکورٹی ایجنسیوں کو دیں اور امن قائم رکھنے میں انتظامیہ کا ساتھ دیں۔ انہوں نے کہا کہ عوامی تعاون کے بغیر دیرپا امن ممکن نہیں۔حکام نے اس عزم کا اعادہ کیا کہ پونچھ ضلع میں امن، سلامتی اور ترقی کو یقینی بنانے کے لئے انسدادِ دہشت گردی کی کارروائیاں پوری قوت کے ساتھ جاری رہیں گی اور ایل او سی کے اْس پار سے دہشت گردی کو فروغ دینے کی ہر کوشش کو ناکام بنایا جائے گا۔
