یو این آئی
ریو ڈی جنیرو/فٹبال کی دنیا کے سب سے بڑے اسٹیج، فیفا ورلڈ کپ 2026 کے لیے برازیلین شائقین کے لیے ایک بڑی خوشخبری سامنے آئی ہے ۔ سینٹوس کے فارورڈ اور برازیل کے لیجنڈری کھلاڑی نیمار جونیئر اپنی انجری کو شکست دے کر ایک بار پھر میدانِ عمل میں واپسی کے بالکل قریب پہنچ گئے ہیں۔33 سالہ نیمار، جو دسمبر میں اپنے بائیں گھٹنے کی سرجری کے باعث میدان سے دور تھے ، اس ہفتے باقاعدہ ٹریننگ سیشنز میں دوبارہ نظر آئے ہیں۔ ٹریننگ گراؤنڈ پر ان کی واپسی نے برازیلین کیمپ میں امید کی لہر دوڑا دی ہے ۔
سینٹوس کے مینیجر جوآن پابلو ووجووڈا نے واضح کیا ہے کہ وہ سابق بارسلونا اسٹار کو میدان میں اتارنے کے لیے کسی قسم کی عجلت کا مظاہرہ نہیں کریں گے تاکہ ان کی انجری دوبارہ سر نہ اٹھا لے ۔نیمار کے لیے اصل امتحان 11 جون سے 19 جولائی تک امریکہ، میکسیکو اور کینیڈا میں ہونے والا ورلڈ کپ ہے ۔ برازیل کے لیے سب سے زیادہ گول کرنے والے اس کھلاڑی نے گزشتہ دو سالوں سے قومی جرسی نہیں پہنی ہے ۔ برازیل کے مینیجر کارلو انچیلوٹی نے صاف کر دیا ہے کہ ورلڈ کپ اسکواڈ میں جگہ صرف انہی کھلاڑیوں کو ملے گی جو اپنے کلب کے لیے مستقل کھیل رہے ہوں گے ۔ اکتوبر 2023 میں یوروگوئے کے خلاف گھٹنے کی شدید تکلیف کے بعد سے نیمار کی فٹنس مسلسل سوالیہ نشان رہی ہے ، لیکن اب وہ وقت کے خلاف اس دوڑ میں خود کو منوانے کے لیے بے تاب ہیں۔
