جموں میں بھی لوگ ٹھٹھرنے لگے، دراس میںمنفی 24.7ڈگری درجہ حرارت ریکارڈ
عظمیٰ نیوز سروس
سرینگر// جمعرات کوسرینگر سمیت وادی کے کئی مقامات نے موسم کی سرد ترین رات کا تجربہ کیا کیونکہ زیادہ تر حصوں میں کم از کم درجہ حرارت میں نمایاں گراوٹ کے ساتھ کشمیر میں سردی کی لہر میں اضافہ ہو گیا ہے۔حکام نے بتایا کہ بدھ اور جمعرات کی درمیانی شب کو وادی میں سرد ترین راتیں ریکارڈ کی گئیں۔ شدید ٹھنڈکی وجہ سے ڈل جھیل سمیت کئی آبی ذخائر کے کنارے پہلی بار جم گئے ۔انہوں نے بتایا کہ سرینگر میں بدھ کی رات کم سے کم درجہ حرارت منفی5.1 ڈگری سیلسیس ریکارڈ کیا گیا اور یہ شہر میں اس سیزن کی اب تک کی سرد ترین رات تھی ۔انہوں نے بتایا کہ وسطی کشمیر کے گاندربل ضلع میں واقع سونمرگ کا سیاحتی مقام جموں اور کشمیر میں سب سے سرد ریکارڈ کیا گیا مقام تھا کیونکہ یہاں کم سے کم درجہ حرارت 9.8 ڈگری سیلسیس تھا۔انہوں نے بتایا کہ شمالی کشمیر کے بارہمولہ ضلع کے گلمرگ میں رات کا درجہ حرارت منفی 9.2 ڈگری سیلسیس پر رہا۔انہوں نے مزید کہا کہ یہ اس موسم سرما میں اب تک کا سب سے کم رات کا درجہ حرارت تھا۔جنوبی کشمیر کے سیاحتی مقام پہلگام میں، کم از کم درجہ حرارت منفی 8.6 ڈگری سیلسیس پر ٹھہرا۔حکام نے مزید کہا، بدھ کی رات یہ موسم کی سرد ترین رات تھی۔عہدیداروں نے بتایا کہ قاضی گنڈ میں کم از کم درجہ حرارت کم از کم منفی 5.4 ڈگری سیلسیس ریکارڈ کیا گیا، جو سیزن کا سرد ترین درجہ حرارت ہے۔انہوں نے مزید کہا کہ کوکرناگ میں منفی 3 اور کپوارہ میں منفی 5.1 ڈگری ریکارڈ کیا گیا۔شوپیاں میں درجہ حرارت منفی 7.8 ، اننت ناگ میں منفی 6.3 ڈگری سیلسیس ریکارڈ کیا گیا۔ قاضی گنڈ، کپواڑہ، بڈگام، بارہمولہ، بانڈی پورہ، گاندربل اور اونتی پورہ سمیت دیگر مقامات پر بھی جمنے والی صورتحال رہی، جہاںکم از کم درجہ حرارت منفی 4 اور 6ڈگری سیلسیس کے درمیان رہا۔وادی کے میدانی علاقوں میں اس موسم میں اب تک کوئی برف باری نہیں ہوئی ہے۔ محکمہ موسمیات نے کہا ہے کہ 22 جنوری تک موسم خشک لیکن ابر آلود رہنے کا امکان ہے۔اس نے کہا کہ وادی میں 10 جنوری تک رات کے درجہ حرارت میں نمایاں کمی دیکھنے میں آئے گی۔
جموں
جموں شہر کا کم سے کم درجہ حرارت 7.1 ڈگری سیلسیس ریکارڈ کیا گیا، جب کہ جموں ہوائی اڈے پر 7.7 ڈگری سیلسیس درج کیا گیا۔
بھدرواہ میں منفی 3.4 ڈگری اور راجوری میں منفی 1.0 ڈگری سیلسیس کے ساتھ ہل اسٹیشنوں اور اندرونی علاقوں میں سرد راتوں کا سامنا کرنا پڑا۔ بانہال، بٹوٹ، رام بن، اودھم پور، ڈوڈہ، کشتواڑ اور پونچھ میں کم سے کم درجہ حرارت 1 سے 4 ڈگری سیلسیس کے درمیان ریکارڈ کیا گیا، جبکہ کٹرہ، سانبہ، کٹھوعہ اور ریاسی نسبتاً زیادہ گرم رہے۔
لداخ
لداخ شدید سردی کی لپیٹ میں رہا، درجہ حرارت انجماد سے بہت نیچے گر گیا۔ دراس میںمنفی 24.7ڈگری سیلسیس درجہ حرارت ریکارڈ کیا گیا۔ نیوما میں منفی 20.1 ڈگری ، جبکہ لیہہ میں منفی 14.6 ڈگری سیلسیس، کرگل میں منفی 13.4 ڈگری سیلسیس اور نوبرا ویلی میں منفی 12.7 ڈگری سیلسیس درج کیا گیا۔
