رمیش کیسر
نوشہرہ//نوشہرہ کے سرحدی گاؤں کلال میں پیر کے روز پیش آنے والے ایک المناک سڑک حادثے میں ایک بزرگ شخص جاں بحق جبکہ دو افراد شدید زخمی ہو گئے۔ حادثہ موٹر سائیکل اور واٹر ٹینکر کے درمیان تصادم کے نتیجے میں پیش آیا جس سے علاقے میں غم کی لہر دوڑ گئی۔ذرائع کے مطابق حادثہ اس وقت پیش آیا جب ایک موٹر سائیکل کلال گاؤں کے نزدیک سڑک پر جا رہی تھی کہ اچانک اس کی واٹر ٹینکر کے ساتھ ٹکر ہو گئی۔ تصادم اس قدر شدید تھا کہ موٹر سائیکل پر سوار 65 سالہ بودراج، جو کلال گاؤں کا رہائشی تھا، موقع پر ہی دم توڑ گیا۔حادثے کی اطلاع ملتے ہی مقامی لوگ اور پولیس اہلکار موقع پر پہنچ گئے۔ زخمیوں کو فوری طور پر سب ضلع ہسپتال نوشہرہ منتقل کیا گیا جہاں ڈاکٹروں نے ان کا علاج شروع کر دیا۔
ہسپتال ذرائع کے مطابق دونوں زخمیوں کی حالت تشویشناک بتائی جا رہی ہے اور انہیں مسلسل طبی نگرانی میں رکھا گیا ہے۔پولیس نے واقعے کے بعد ضروری قانونی کارروائی انجام دیتے ہوئے جاں بحق شخص کی لاش کو پوسٹ مارٹم کے لیے ہسپتال منتقل کیا۔ پوسٹ مارٹم مکمل ہونے کے بعد لاش ورثاء کے حوالے کر دی گئی تاکہ آخری رسومات ادا کی جا سکیں۔پولیس حکام نے بتایا کہ حادثے میں شامل موٹر سائیکل اور واٹر ٹینکر دونوں کو اپنی تحویل میں لے لیا گیا ہے۔ واقعے کے حوالے سے مقدمہ درج کر کے مزید تحقیقات شروع کر دی گئی ہیں تاکہ حادثے کی اصل وجوہات کا پتہ چلایا جا سکے۔علاقہ مکینوں نے افسوس کا اظہار کرتے ہوئے سڑکوں پر احتیاطی تدابیر اختیار کرنے اور ٹریفک قوانین کی سختی سے پابندی کی ضرورت پر زور دیا ہے تاکہ مستقبل میں ایسے افسوسناک حادثات سے بچا جا سکے۔ حادثے کے بعد پورے کلال گاؤں میں سوگ کی فضا قائم ہے اور مقامی لوگوں نے مرحوم بودراج کے اہل خانہ سے تعزیت کا اظہار کیا ہے۔
اچھاد مینڈھر میں ڈمپر حادثے کا شکار، دو افراد زخمی
جاوید اقبال
مینڈھر//سب ڈویژن مینڈھر کے اچھاد علاقے میں پیر کے روز ایک ڈمپر سڑک حادثے کا شکار ہو گیا، جس کے نتیجے میں دو افراد زخمی ہو گئے۔ حادثے کے بعد علاقے میں کچھ دیر کے لیے افراتفری کا ماحول پیدا ہو گیا جبکہ مقامی لوگوں نے فوری طور پر امدادی کارروائیاں شروع کر دیں۔ڈمپر زیر نمبر JK02BF-9023 پونچھ سے مینڈھر کی جانب آ رہا تھا کہ اچھاد کے مقام پر اچانک ڈرائیور کا گاڑی پر قابو ختم ہو گیا، جس کے باعث گاڑی حادثے کا شکار ہو گئی۔ حادثے کی آواز سن کر مقامی لوگ بڑی تعداد میں موقع پر پہنچ گئے اور زخمیوں کو گاڑی سے باہر نکالنے میں مدد فراہم کی۔
مقامی شہریوں نے بروقت کارروائی کرتے ہوئے دونوں زخمیوں کو فوری طور پر سب ضلع ہسپتال مینڈھر منتقل کیا، جہاں ڈاکٹروں کی ٹیم نے ان کا طبی معائنہ اور علاج شروع کیا۔ہسپتال ذرائع کے مطابق زخمیوں کی شناخت محمد یاسر اور محمد رفیع کے طور پر ہوئی ہے۔ ڈاکٹروں نے ابتدائی طبی امداد فراہم کرنے کے بعد محمد یاسر کی حالت تشویشناک قرار دیتے ہوئے اسے مزید اور بہتر علاج کے لیے گورنمنٹ میڈیکل کالج راجوری منتقل کر دیا، جبکہ محمد رفیع کا علاج سب ضلع ہسپتال مینڈھر میں جاری ہے اور اس کی حالت مستحکم بتائی جا رہی ہے۔حادثے کی اطلاع ملنے کے بعد پولیس بھی موقع پر پہنچ گئی اور ضروری کارروائی انجام دی۔ پولیس نے حادثے کا مقدمہ درج کر کے واقعے کی وجوہات جاننے کے لیے تحقیقات شروع کر دی ہیں۔ ابتدائی طور پر حادثے کی اصل وجہ معلوم نہیں ہو سکی، تاہم پولیس مختلف پہلوؤں سے معاملے کی جانچ کر رہی ہے۔مقامی لوگوں نے انتظامیہ سے مطالبہ کیا ہے کہ پہاڑی اور حساس سڑکوں پر حفاظتی اقدامات کو مزید مؤثر بنایا جائے تاکہ مستقبل میں ایسے حادثات سے بچا جا سکے۔
