عظمیٰ نیوز سروس
راجوری//راجوری اسمبلی حلقہ میں بنیادی ڈھانچے کو مضبوط بنانے کی سمت ایک اہم قدم اٹھاتے ہوئے ایم ایل اے راجوری افتخار احمد نے پی ایم جی ایس وائی سڑک کو اُپر گجران سے ہوتے ہوئے دسہل جٹاں کے راستے دسہل گلی تک جوڑنے والے طویل عرصے سے زیر التوا سڑک منصوبے کا سنگِ بنیاد رکھا۔ اس منصوبے پر تقریباً 50 لاکھ روپے کی لاگت آئے گی اور اس کا مقصد دور دراز اور پہاڑی علاقوں میں رہنے والے لوگوں کو بہتر سفری سہولیات فراہم کرنا ہے۔سنگِ بنیاد کی تقریب کے موقع پر مقامی لوگوں نے ایم ایل اے کا پْرتپاک استقبال کیا۔ مقامی آبادی کا کہنا تھا کہ وہ اس سڑک کا مطالبہ گزشتہ کئی برسوں سے کر رہی تھی اور اب اس منصوبے کے آغاز سے ان کی دیرینہ مانگ پوری ہو گئی ہے۔ تقریب میں مختلف محکموں کے سینئر افسران بھی موجود تھے جنہوں نے عوام سے ملاقات کی، ان کے مسائل سنے اور جلد از جلد حل کی یقین دہانی کرائی۔اس موقع پر خطاب کرتے ہوئے ایم ایل اے افتخار احمد نے کہا کہ حکومت دیہی اور پہاڑی علاقوں میں بنیادی ڈھانچے کی بہتری کیلئے پرعزم ہے تاکہ متوازن ترقی کو یقینی بنایا جا سکے۔ انہوں نے کہا کہ بہتر سڑک رابطہ نہ صرف روزمرہ آمد و رفت کو آسان بنائے گا بلکہ علاقے کی سماجی و اقتصادی سرگرمیوں کو بھی فروغ دے گا۔ایم ایل اے نے متعلقہ ایگزیکیوٹنگ ایجنسیوں کو ہدایت دی کہ تعمیراتی کام میں معیار پر کسی قسم کا سمجھوتہ نہ کیا جائے اور منصوبے کو مقررہ وقت کے اندر مکمل کیا جائے۔ انہوں نے واضح کیا کہ سڑک کی تعمیر میں کسی بھی قسم کی لاپرواہی برداشت نہیں کی جائے گی کیونکہ یہ سڑک آئندہ کئی دہائیوں تک مقامی آبادی کی ضروریات پوری کرے گی۔مقامی لوگوں نے اس منصوبے کے آغاز پر خوشی کا اظہار کرتے ہوئے ایم ایل اے کا شکریہ ادا کیا اور امید ظاہر کی کہ سڑک کی تکمیل کے بعد خاص طور پر خراب موسمی حالات کے دوران انہیں آمد و رفت میں بڑی سہولت حاصل ہوگی۔
