ممبراسمبلی پونچھ کادورہ ٔ دیہات

 پونچھ//ایم۔ایل۔اے پونچھ شاہ محمد تانترے نے حلقہ انتخاب حویلی کے دُور دراز علاقہ پنج ککڑیاں اور اس کے گرد و نواح کا دورہ کر کے عوامی مسائل کا جائزہ لیا۔ یہاں تک پہنچنے کے لئے اُنہیں تقریباً دس کلومیٹر پیدل مسافت طے کرنا پڑی جس کے لئے عوامِ علاقہ نے اُن کا پُرتپاک اور والہانہ استقبال کیا۔ اس موقع پر متعدد افراد نے نیشنل کانفرنس اور کانگریس کو چھوڑ کر ممبر اسمبلی اور دیگر سینئر پارٹی لیڈران کی موجودگی میں پی۔ڈی۔پی میں شمولیت اختیار کی۔ عوام کا کہنا تھا کہ ایم۔ایل۔اے موصوف اس علاقہ میں ضرورت کے وقت میں حاضر آئے ہیں جب کہ سیاسی لیڈران تو انتخابات کے دئوران ہی دکھائی دیتے ہیں جس کی وجہ سے عوام متاثر ہو کر پارٹی میں شامل ہوئے ہیں ۔ حاضرین کا کہنا تھا کہ ہم’ غریبوں کے کارواں‘  کی باتیں تو سُنتے آئے تھے لیکن آج اس کارواں کے سپہ سالار کو غریب عوام کے ساتھ اُنہی کے رسوئی گھر میں نہایت سادگی سے بیٹھا دیکھ کر کافی خوش ہوئے ہیں۔ اس موقع پر ایم۔ایل۔اے نے عوام کے لوگوں سے خطاب کرتے ہوئے کہا کہ اِن شاء اللہ وہ اگلے ترقیاتی منصوبہ میں اس علاقہ تک سڑک پہنچانے کا ضروراہتمام کریں گے۔ اُنہوں نے کہا کہ وہ عوامِ علاقہ تک تمام بُنیادی سہولتیں پہنچانے کا بھر پُور وعدہ کرتے ہیں اور اُنہیں اس بات کی مکمل یقین دہانی کراتے ہیں کہ اس علاقہ کی ترقی بھی دیگر علاقوں کے طرح ہی کی جائے گی۔ انہوں نے کہا کہ ریاستی حکومت اس وقت محبوبہ مفتی کی قیادت میں ترقی کے نئے زینے طے کر رہی ہے اور علاقہ پونچھ بھی اس سے مستفید ہو رہا ہے۔ تانترے نے عوام کو بتایا کہ ریاستی وزیرِ اعلیٰ اتنی دُور اندیش اور وسیع القلب ہیں کہ اُنہوں نے اپنے حالیہ دئورہ پونچھ کے دئوران مُختلف طبقہ ہائے فکر اور مختلف سیاسی پارٹیوں کے وفود کو نہ صرف تحمل سے سُنا بلکہ اُنہیں درپیش مسائل کو موقع پر ہی حل کرنے کی ہدایات بھی دیں۔