یواین آئی
کنشاسا// مشرقی کانگو کے شمالی کیوو صوبے میں بے گھر لوگوں کے تین کیمپوں پر حملوں میں بچوں اور خواتین سمیت کم از کم 12 افراد ہلاک اور 30 سے زائد زخمی ہو گئے۔اقوام متحدہ نے جمعہ کو یہ اطلاع دی۔ اقوام متحدہ نے ایک بیان میں کہا، “مشرقی صوبے شمالی کیوو کے دارالحکومت گوما کے تین آئی ڈی پی مراکز پر ہونے والے حملوں میں لوشگالہ، گوماکے لیک ورٹ مونگانگ علاقوں میں واقع پناہ گاہوں اور دیگر انسانی ڈھانچے کو بھی نقصان پہنچا ہے۔ اقوام متحدہ نے ان حملوں کو انسانی حقوق اور بین الاقوامی انسانی قانون کی سنگین خلاف ورزی قرار دیتے ہوئے کہا کہ انہیں جنگی جرائم قرار دیا جا سکتا ہے۔کانگو کی حکومت نے 23 مارچ کی تحریک (ایم23) کے باغیوں پر حملوں کا الزام لگایا، جو ڈیموکریٹک ریپبلک آف کانگو (ڈی آر سی) کی فوج کے ساتھ متصادم ہیں اور انہوں نے شمالی کیوو کے علاقوں پر قبضہ کر لیا ہے۔ڈی آر سی میں اقوام متحدہ کے پناہ گزینوں کے ادارے (یو این ایچ سی آر) کے نمائندے اینجل ڈیکونگو-اتنگانہ نے کہا’’شمالی کیوو صوبے کی شہری آبادی نے اس خونریز تنازع کے دو سال سے زیادہ عرصے میں انسانی حقوق کی بدترین خلاف ورزیوں کا مشاہدہ کیا ہے‘‘۔کانگو کے صدرفیلکس شیسیکیدی کے دفتر نے ایک بیان میں کہا کہ صدرفیلکس شیسیکیدی نے اس حملے کے بعد اپنا دورہ منسوخ کرنے اور یوروپ سے وطن واپس آنے کا فیصلہ کیا ہے۔ صدر طویل عرصے سے روانڈا پرایم23 باغیوں کی حمایت کرکے کانگو کو غیر مستحکم کرنے کا الزام لگاتے رہے ہیں۔
