مزید خبریں

زاہدبشیر

گول//جہاں بازاروں کو جاذب نظر بنانے کے لئے انتظامیہ، محکموں کا یہ رول ہونا چاہئے کہ چار سو صفائی ستھرائی کا خیال رکھا جائے اور اس بارے دکانداروں اور دیگر لوگوں کو بھی جانکاری دی جانی چاہئے لیکن گول میں سب کچھ اس کے بر عکس ہی ہوتا ہے ۔ یہاں پر سوچھ بھارت مشن نام کی کوئی چیز ہی موجود نہیں ہے ۔ محکمہ دیہی ترقی ، پنچایتوں کو لاکھوں روپے آتے ہیں لیکن وہ نہ ہی اس بارے میں کوئی جانکاری کیمپ لگاتے ہیں اور نہ ہی زمینی سطح پر صفائی کا کوئی خیال رکھا جا رہا ہے ۔گول بازار جو کہ یہاں آنے جانے اور ایک اہم ہے جہاں صفائی کا خاص خیال ہونا چاہئے تھا لیکن یہاں ہفتوں مہینوں گندگی کے ڈھیر لگے ہوئے ہوتے ہیں ۔ اس گندگی کا نظار ہ نہ صرف یہاں کی عوام ، راہگیر بلکہ وہ ذمہ دار لوگ بھی دیکھتے ہیں جو الیکشنوں کے دوران لوگوں کو اس طرح کی تعمیر و ترقی کا دعویٰ کرتے نظر آ رہے تھے ۔ ترقی صرف تعمیر ہی نہیں بلکہ اگر کوئی چیز تعمیر ہوتی ہے پھر اس کی صفائی نہیں ہے اس کا بہتر استعمال نہیں تو یہ ترقی نہیں بلکہ زوال ہے ۔ اس طرح کی حکمت عملی گول میں دیکھنے کو مل رہی ہے ۔ جہاں محکمے اپنی ذمہ داری کو ذمہ داری نہیں سمجھتے ہیں بلکہ ایک احسان سمجھا جاتا ہے ۔ گریف حکام کے سپرد گول کی سڑک پر آبِ نکاس کا کوئی انتظام نہیں ہے ۔ سڑک کے کنارے قریباً دو کلو میٹر نالی نہیں بنی اور یہاں جو گندگی کے ڈھیر جمع ہوتے ہیں وہ مصیبت بن کر آتی ہے ۔ قریباً دو ہفتے قبل یہاں پر گریف نے نالیوں سے گندگی اُٹھائی اور سڑک کے کنارے رکھ دی اور اُس کے بعد اس کو کسی نے نہیں اُٹھایا بلکہ یہی گندگی پھر سے سڑک میں پھیل رہی ہے جس وجہ سے جہاں راہگیروں کو شدید پریشانیوں کا سامنا کرنا پڑ رہا ہے وہیں دکانداربھی کافی پریشان ہیں ۔ دکانداروں اور راہگیروں نے کشمیر عظمیٰ کے ساتھ بات کرتے ہوئے کہا کہ یہ گریف حکام کی سخت لا پروائی ہے جس وقت صفائی کی جاتی ہے اُسی وقت یہ گندگی اُٹھانی چاہئے تا کہ دکاندار بھی گندگی ڈالنے سے احتیاط کریں ۔ انہوں نے انتظامیہ سے مطالبہ کیا کہ وہ گریف حکام پر دبائو ڈالیں اور بازار کی سڑک کے کنارے جمع گندگی کو جلد از جلد اُٹھایا جائے تا کہ پریشانیوں کا سد باب ہو سکے ۔

 

 

 

 

 

اشتیاق ملک

ڈوڈہ //سابق رکن اسمبلی دلیپ سنگھ پریہار نے مرکزی وزیر مملکت ڈاکٹر جتندرا سنگھ کے ساتھ ملاقات کرکے بھدرواہ و بھلیسہ سے جڑے عوامی مسائل سے آگاہ کیا۔ پریہار نے وزیر موصوف سے بھدرواہ کو ضلع کا درجہ دلانے، ڈوڈہ بھدرواہ شاہراہ کی مرمت کرنے، ٹھاٹھری کالجگاسر قومی شاہراہ و چھترگلہ ٹنل کی تعمیر شروع کرنے، آیوش پروجیکٹ کی تعمیر میں سرعت لانے، وی ڈی سی ممبران و ایس پی اوز کے ماہانہ مشاہرہ میں اضافہ کرنے کا مطالبہ کیا۔ انہوں نے بھالہ کو سب ڈویڑن کا درجہ دینے، چنتا بھالڑا، اٹھکار، چلی و چنگا کلہوتران کو تحصیل کا درجہ دینے کی بھی مانگ کی۔مرکزی وزیر موصوف نے سابق رکن اسمبلی کو یقین دلایا کہ ان مطالبات کو لیفٹیننٹ گورنر و مرکزی قیادت کی نوٹس میں لا کر ترجیحی بنیادوں پر پورا کرنے کا عمل شروع کیا جائے گا۔

 

 

 

 

اشتیاق ملک

ڈوڈہ //ڈوڈہ ضلع میں اتوار کوکورونا وائرس کے 13 نئے مثبت معاملات سامنے آئے ہیں اور 6 مریض صحتیاب ہوئے ہیں جبکہ جی ایم سی ڈوڈہ میں ایک خاتون فوت ہوئی ہے۔ اطلاعات کے مطابق اتوار کے روز ڈوڈہ، بھدرواہ، ٹھاٹھری،گندوہ و عسر میں ہوئی کوؤڈ جانچ کے دوران تیرہ افراد کی ٹیسٹ رپورٹ مثبت آئی ہے جنہیں ہوم قرنطینہ میں رکھا گیا ہے اور چھ مریض صحتیاب ہوئے ہیں۔ اس دوران بھدرواہ سے تعلق رکھنے والی ایک خاتون کی گورنمنٹ میڈیکل کالج میں موت ہوئی ہے اور اس طرح سے ضلع میں کورونا وائرس سے مرنے والوں کی تعداد 130 پہنچ گئی ہے جبکہ فعال کیسوں کی تعداد 96 و شفایاب ہوئے مریضوں کی مجموعی تعداد 7327 پہنچ گئی ہے۔ضلع میں 276183 افراد کو ٹیکے لگائے گئے ہیں۔

 

 

 

رام بن// ضلع رام بن میں کووڈ پروٹوکول کو نافذ کرنے کی مہم کو جاری رکھتے ہوئے انفورسمنٹ ٹیموں نے اتوار کو چہرے کے ماسک نہ پہننے اور جسمانی فاصلہ برقرار نہ رکھنے پر گھومنے پر متعدد خلاف ورزی کرنے والوں پر جرمانہ عائد کیا۔نافذ کرنے والی ٹیموں نے اپنے متعلقہ دائرہ کار میں معائنہ کے دوران 6ہزار100 روپے جرمانہ وصول کیا ۔انفورسمنٹ افسران نے لوگوں پر زور دیا کہ وہ چہرے کے ماسک پہنیں اور جسمانی فاصلہ برقرار رکھیں اس کے علاوہ اپنے قریبی سی وی سی پر کوویڈ ویکسی نیشن کی خوراکیں لیں۔ڈسٹرکٹ امیونائزیشن آفیسر رام بن ڈاکٹر سریش نے بتایا کہ اتوار کو ضلع رام بن میں 951 افراد کو پہلی اور دوسری کوویڈ ویکسین کی خوراک دی گئی۔چیف میڈیکل آفیسر رام بن ڈاکٹر محمد فرید بھٹ کی طرف سے جاری کردہ روزانہ بلیٹن کے مطابق محکمہ صحت نے 911 نمونے جمع کیے ہیں جن میں 238 ، RT-PCR اور 673 ،RAT نمونے شامل ہیں اس کے علاوہ 951 افراد کو کوویڈ ویکسین ضلع کے مخصوص ویکسی نیشن سینٹرز میں دی گئی ہے۔

 

 

 

عاصف بٹ

کشتواڑ//ضلع کشتواڑ میں آزدای کی سات دہائیوں بعد بھی کئی علاقے بجلی سے محروم ہیں وہیں ضلع ہیڈکوارٹر سے محض چالیس کلومیٹر دور  سب ڈویژن چھاترو کے علاقہ چنگام کے کولمولہ گائوں کے عوام کی خوشی کااس وقت کوئی ٹھکانہ نہ رہا جب علاقہ کو پہلی بار بجلی سہولت فراہم کی گئی۔ تین گائوں پر مشتمل 50 کے قریب گھروں کو اس بجلی سے فائدہ ہوگا۔ اس موقعہ پر لوگوں نے بتایا کہ جہاں چند سال قبل علاقہ میں پول لگائے گئے تھے لیکن پھر کام کو ادھورا چھوڑا گیا لیکن آج علاقے کو روشن کیا گیا۔ انھوں نے کہا کہ یہ خوش قسمتی کی بات ہے کہ انکے بچے بھی شام کے اوقات میں پڑھ سکیںگے جبکہ انکی مشکلات میں بھی کمی ہوگی ۔انھوں نے انتظامیہ کا شکریہ ادا کیا۔ 

 

 

 

محمد تسکین

بانہال // بانہال قصبہ میں مسافر گاڑیوں کے سٹینڈ کو منتقل کرنے کے خلاف بانہال میں دو روز سے جاری دکانداروں اور ٹرانسپورٹروں کی ہڑتال ڈپٹی کمشنر رام بن کی یقین دہانی کے بعد ختم کرنے کا اعلان کیا گیا ہے اور دکانداروں اور ٹرانسپورٹروں سے کہا گیا ہے کہ وہ پیر کے روز سے اپنا کاروبار دوبارہ شروع کریں۔اتوار کے روز بیوپار منڈل بانہال کی ایک میٹنگ منعقد ہوئی جس میں ڈی ڈی سی کونسلر امتیاز کھانڈے، سابق صدر بیوپار منڈل بانہال شمس الدین راہی، کے علاوہ سرپنچوں ، پنچوں اور دیگر سیاسی کارکنوں اور شہریوں نے شرکت کی۔ اس موقع پر صدر بیوپار منڈل بانہال نصیر احمد وانی نے ذرائع ابلاغ کے نمائندوں کو بتایا کہ ڈپٹی کمشنر رام بن مسرت الاسلام نے فون پر انہیں بتایا ہے کہ وہ مسافر گاڑیوں کے سٹینڈ کے مسئلے کو آئندہ دو روز میں بانہال آکر موقع پر ہی حل کرینگے۔ نصیر احمد وانی نے مزید کہا کہ ڈپٹی کمشنر رام بن مسرت الاسلام کی اس یقین دہانی کے بعد متفقہ طور فیصلہ لیا گیا کہ آج یعنی پیر کے روز سے دکاندار اور ٹرانسپورٹر اپنی ہڑتال کو ختم کرکے اپنی کاروباری سرگرمیاں دوبارہ شروع کریں گے۔ 

 

 

 

 

 ایم ایم پرویز

رام بن//سوشل میڈیا پر کئی ماہ پرانی ویڈیو کے دوبارہ منظر عام پر آنے کے بعد ایک پولیس افسر کو ضلعی پولیس سربراہ نے معطل کر دیا جس میں ایک پولیس افسر (ایس آئی) نے مبینہ طور پر تھانہ رام بن میں کچھ افراد سے رشوت مانگتے ہوئے دکھایاگیاہے۔ایک بیان میں رام بن پولیس نے اس ویڈیو کے حوالے سے وضاحت پیش کی ہے جو کہ سوشل میڈیا سائٹس پر سامنے آئی ہے کہ یہ ویڈیو جعلی ہے اور ضلعی پولیس رام بن کی تصویر کو خراب کرنے کے مذموم ارادوں کے ساتھ دوبارہ وائرل کیا گیا ہے۔پولیس نے واضح کیا کہ مذکورہ ویڈیو مہینہ پہلے ایک شخص نے ریکارڈ کی تھی جس کی شناخت دلباغ سنگھ ولد رنجیت سنگھکے طور ہوئی ،جوکہ رنجیت سنگھ کارشتہ دارتھاجس کے خلاف دفعہ 462/323/504/506 کے تحت ایف آئی آر نمبر 174/2020 کیس در ج ہے اور شکایت کنندہ جھوٹے الزامات اور جعلی شواہد پر ایف آئی آردرج کرانا چاہتاتھا۔پولیس نے کہا کہ سوشل میڈیا سائٹس پر سامنے آنے والی ویڈیو میں دکھائے گئے افسر کو معطل کرکے مذکورہ افسر کے خلاف محکمانہ انکوائری شروع کی گئی۔پولیس نے کہا کہ یہ ویڈیو رام بن پولیس کی شبیہ کو خراب کرنے کے لیے شیئرکی جارہی ہے۔ضلعی پولیس نے عام لوگوں سے درخواست کی ہے کہ وہ افواہوں پر دھیان نہ دیں اور سوشل میڈیا میں مواد شیئر کرنے سے پہلے حقائق کو چیک کریں۔

National Sports Day at Jammu

 

 

 

جموں// صوبہ جموںمیں ہاکی کے عظیم کھلاڑی میجر دھیان چند کو ان کی سالگرہ کے موقع پر پھولوں کے خراج عقیدت پیش کیے گئے ، جو پورے ہندوستان میں قومی کھیلوں کے دن کے طور پر بھی منایا جاتا ہے۔

قومی کھیلوں کا دن جے اینڈ کے اسپورٹس کونسل نے یہاں کے کے ہکو ایسٹرو ٹرف ہاکی اسٹیڈیم میں جوش و خروش سے منایا۔ سپورٹس کونسل نے مختلف مقامات پر ہاکی اور فٹ بال کے میچوں سمیت کھیلوں کی ایک سیریز کی میزبانی کی تاکہ میجر دھیان چند کو ان کی 116 ویں سالگرہ پر خراج تحسین پیش کیا جائے۔ ڈویژنل کمشنر جموں نے اپنے پیغام میں نوجوانوں اور کھلاڑیوں کے درمیان کھیلوں کے ذریعے قومی کردار اور اخلاقی اقدار کو فروغ دینے پر زور دیا۔جے اینڈ کے سپورٹس کونسل کے چیف اکاؤنٹس آفیسر ڈاکٹر ظفر اقبال تقریب کے مہمان خصوصی تھے جبکہ راجندر سنگھ کوکو جنرل سیکرٹری ہاکی انڈیا مہمان خصوصی تھے۔ مہمان خصوصی نے سپورٹس ڈے کی اہمیت پر روشنی ڈالی اور نوجوانوں کو مشورہ دیا کہ وہ اپنے مقصد کے حصول کے لیے کوشش کریں۔قومی کھیلوں کے دن جموں کے ڈویڑنل اسپورٹس آفیسر اشوک سنگھ کے لکھے گئے ایک مضمون کو مہمان خصوصی نے جاری کیا۔ راجیو شرما ، صدر ہاکی جے اینڈ کے نے بھی اس موقع پر خطاب کیا۔

 قومی کھیلوں کے دن کی تقریب کے موقع پر جموں و کشمیر سپورٹس کونسل کے کوچز نے یہاں ہاکی لیجنڈ کی یاد میں سپورٹس اسٹیڈیم ادھم پور میں ایک شاندار تقریب کا اہتمام کیا۔ ایڈیشنل ڈپٹی کمشنر محمد سید خان مہمان خصوصی تھے اور کونسلر وارڈ نمبر -01 پریتی کھجوریہ مہمان خصوصی تھیں جو ڈسٹرکٹ ہاکی ایسوسی ایشن ادھم پور کی صدر بھی ہیں۔ میناکشی شرما اور ڈاکٹر جسمت کور اس موقع پر مہمان خصوصی تھے۔شروع میں منیجر سپورٹس کونسل اودھم پور نوین شرما نے استقبالیہ خطاب پیش کیا اور قومی کھیلوں کے دن کی اہمیت پر روشنی ڈالی۔

محکمہ یوتھ سروسز اینڈ سپورٹس کشتواڑ نے کبڈی میچ کا انعقاد کرکے قومی کھیل کا دن منایا۔ لیجنڈری ہاکی کھلاڑی میجر دھیان چند کو بھی خراج عقیدت پیش کیا گیا۔ایونٹ ڈسٹرکٹ یوتھ سروسز اینڈ سپورٹس آفیسر کھارتی لال شرما کی رہنمائی اور نگرانی میں منعقد ہوا۔    

 قومی کھیلوں کے دن ، ضلع ریاسی کے ہائی سکول شیرسندوان بلاک بھوماگ زون ارناس میں والی بال میچ کا اہتمام کیا گیا۔ والی بال میچ پنچایت لمسورہ اور پنچایت شیرسندوان کی ٹیموں کے درمیان کھیلا گیا جس میں پنچایت لمسورہ کی ٹیم نے میچ جیتا۔ہرجیت سنگھ اور اتم سنگھ فزیکل ایجوکیشن سٹاف یوتھ سروسز اینڈ اسپورٹس ڈیپارٹمنٹ ریاسی میچ کے ریفری تھے۔

 

 

 جموں//ہفتہ وار 'ٹیلنٹ ہنٹ کیمپ' جو کہ محکمہ یوتھ سروسز اینڈ سپورٹس (ڈی وائی ایس ایس) ، سپورٹس سیورز فٹ بال کلب (ایس ایس ایف سی) کے تعاون سے سپورٹس اینڈ سوشل ویلفیئر ٹرسٹ اور دیہی علاقوں کے نوجوان فٹ بال شائقین کے لیے سپورٹس لائن جیب کل ایک مثبت نوٹ پریہاں جموں شہر کے مضافات میں آنے والے کھیل گاؤں  نگروٹا کے واحد مصنوعی ٹرف پر اختتام پذیر ہوا۔ تقریبا ً100 نوجوان لڑکے اور لڑکیاں ، بشمول ضلع اودھمپور کے ، بڑے پیمانے پر سفر کرنے والے اور بین الاقوامی فٹ بالر ارون ملہوترا سے بنیادی باتیں سیکھیں۔اس کامیاب ایونٹ کے اختتام پر منتظمین نے نوجوانوں اور لڑکوں کی حوصلہ افزائی کی اور انہیں کھیلوں کے سامان تحائف پیش کیے۔ میزبان کلب ایس ایس ایف سی نے ناگروترہ فٹ بال کلب کے کنوینر نریندر سنگھ کو ایونٹ کو یادگار بنانے میں ان کے تعاون کی علامت کے طور پر 10 فٹ بال بھی پیش کیے۔اس موقع پر ، اسسٹنٹ کمشنر جنرل جموں (اے سی جی) ، راکیش دوبے نے نوجوان فٹبالرز کی حوصلہ افزائی کی اور ارون ملہوترا کو مشورہ دیا کہ وہ اپنے جوش اور جذبہ کے ساتھ جاری رکھیں تاکہ نوجوانوں میں خام صلاحیتوں کی تربیت اور رہنمائی کی جاسکے۔اے سی جی کو دیگر ممتاز اجتماعات کی موجودگی میں ضلع آفیسر (ڈی وائی ایس ایس) ، سکھدیو راج شرما نے کھیلگوان کی موجودہ حیثیت اور توسیعی منصوبوں کے بارے میں بھی وضاحت کی۔یہاں یہ بتانا ضروری ہے کہ ، جموں کے آنے والے کھیلگاؤں ، نگروٹا کو یوتھ سروسز اینڈ سپورٹس ڈیپارٹمنٹ کے ذریعہ کھیلوں کا مرکز بنایا جا رہا ہے۔

زاہد بشیر

گول//گرین ویلی ایجوکیشنل اینڈ ریسرچ ٹرسٹ کی جانب سے گول میں والی بال ٹورنامنٹ منعقد کرایا گیا۔ آج کھیلوں کے قومی دن پر ٹورنامنٹ کا فائنل میچ کھیلا گیا اس پروگرام کے مہمان خصوصی جے کے بنک کے منیجر منظور احمد بیگ تھے جبکہ حفیظ الرحمان زوہد جو گرین ویلی ایجوکیشنل اینڈ ریسرچ ٹرسٹ کے چیئرمین بھی ہیں مہمان ذی وقار تھے ۔اس کے علاوہ زونل سپورٹ آفیسر ذریفہ بیگم ذونل نوڈل آفیسر فٹ انڈیا بشیر احمد وانی بھی تقریب میں شامل تھے کھلاڑیوں کو ٹرافی کے علاوہ نقدی انعام بھی دیا گیا۔والی بال کے اس میچ میں سیمی فائنل میں سنگلدان اے اور گول کی ٹیم کے درمیان کھیلا گیا اور سنگلدان کی ٹیم نے گول کو ہرا کر فائنل میں پہنچی اور فائنل کا میچ سنگلدان اے اور مہاکنڈاے کے بیچ کھیلا گیا اور سنگلدان اے ٹیم نے کافی آسانی کے ساتھ اس فائنل کواپنے نام کر دیا ۔ کھیل کی اہمیت اور کھیل کود میں نوجوانوں کو حصہ لینے کے لئے اور اس موجودہ دور میں نشہ کی لت میں پھنسنے جا رہے نوجوانوں کو کھیلوں کی جانب راغب کرانے پر یہاں آخر پر تمام شائقین اور کھلاڑیوں کے ساتھ نوجوان اُستاد نواز احمد وانی نے مفصل طو رپر اس پر روشنی ڈالی ۔ انہوں نے کہا کہ اس وقت کے دور میں جہاں نوجوان ایک ایسی بری لت میں پھنستا جا رہا ہے کھیل کود میں ان کو شامل کرنا وقت کی اہم ضرورت ہے ۔انہوں نے کہا کہ کھیل سے نہ صرف یہ نوجوان اس بری لت سے باہر آ سکتے ہیں بلکہ کھیل نشو و نما کے لئے بھی ضروری ہے ۔ اسموقعہ پر انہوں نے کہا کہ نوجوانوں کو کھیل کود میں بڑھ چڑھ کر حصہ لینا چاہئے اور بہتر سے بہتر کار کردگی دکھا کر نہ صرف گول بلکہ بیرون اضلاع و بیرون ریاست میں اپنا لوہا منوانا چاہے ۔انہوں نے اس موقعہ پر باقی لوگوں کو بھی اس طرح کے کھیل کود کرانے کی صلاح دی تا کہ ہر ایک نوجوان اپنی صلاحیت کا مظاہرہ کر سکے ۔ انہوں نے کہا کہ ہمارے گول میں بہت سارے نوجوان ایسے ہیں جن کو موقعہ نہیں ملتا کہ اُن میں جو ہنر ہے وہ لوگوں کے سامنے رکھ سکے اگر اس طرح کے کھیل کھیلے جائیں تو ضرور ایسے نوجوانوں کو موقعہ ملے گا جو پردے کے پیچھے ہیں اور جو اُن میں ہنر ہے وہ دکھا نہیں سکتے ہیں ۔

 

 

 محمد تسکین

بانہال// سب ڈویڑن رامسو کے چکہ پنچایت سربگھنی بی علاقے میں محکمہ امْور صارفین و عوامی تقسیم کاری کی طرف سے راشن کا ایک اضافی کائونٹر کھولا گیا جو عوام کی دیرینہ مانگ تھی ۔ اس موقع پر بلاک ترقیاتی کونسل چیئرمین رامسو شفیق احمد کٹوچ اور محکمہ آمور صارفین و عوامی تقسیم کاری کے انچارج افسر پرویز احمد گیری اور معززین علاقہ بھی موجود تھے۔ لوگوں نے اس دور افتادہ پہاڑی علاقے میں محکمہ امور صارفین و عوامی تقسیم کاری کی طرف سے کھولے گئے ایکسٹینشن کائونٹر پر اپنی خوشی کا اظہار کیا ہے اور اس کیلئے چیئرمین بی ڈی سی رامسو شفیق احمد کٹوچ اور محکمہ امور صارفین کی حکام کی کوششوں کیلئے ان کا شکریہ ادا کیا گیا ہے۔ لوگوں کا کہنا کہ علاقہ چکہ میں راشن ڈیپو کھولنے کیلئے لوگوں کی دیرینہ مانگ کو پورا کیا گیا ہے جس سے مقامی لوگوں کو راحت ملے گی۔ 

 

عاصف بٹ

کشتواڑ//ضلع کشتواڑ کے دورافتادہ علاقہ سب ڈویژن پاڈرمیں ڈی ایل ایس اے کی طرف سے لوک عدالت کا اہتمام کیا گیاجس دوران سینکڑوں معاملوں کا بروقت نپٹارا کیا گیا۔ اس موقعہ پر چیئرمین ضلع لیگل سروس اتھارٹی وائی پی کوتوال ،منصف جج مہ جبین آرا و دیگر افسران بھی موجود تھے جس دوران سینکڑوں روزمرہ کے کیسوں کے علاوہ محکمہ جل شکتی ، محکمہ پی ڈی ڈی کے معاملات کا بھی نپٹارا کیا گیا جبکہ عوام نے مطالبہ کیا کہ اس طرح کے کیمپ آئندہ بھی لگائے جانے چاہئیں تاکہ انکی مشکلات میں کمی ہوئی اور جلد مقدمات کا نپٹارہ ہوسکے۔

 

 

جموں مغرب اسمبلی حلقہ میں ناقص بنیادی سہولیات پر اظہار ِ تشویش

جموں//اپنی پارٹی ضلع اکائی جموں اربن نے جموں مغرب اسمبلی حلقہ میں ناقص بنیادی سہولیات پر تشویش کا اظہار کیا ہے۔ جموں ضلع اربن جنرل سیکریٹری شردیش رانا کے زیر اہتمام جموں مغرب اسمبلی حلقہ کے وارڈ نمبر31میں منعقدہ پروگرام جس کی صدارت ضلع صدر جموں اربن پرنو شگوترہ نے کی، میں ترقیاتی کاموںمیں ناکام رہنے پر انتظامیہ کو تنقید کا نشانہ بنایاگیا۔ اپنے خطاب میں شگوترہ نے کہاکہ جموں مغرب وارڈ نمبر31میں لوگوں نے نالیوں اور راستوں کی خستہ حالت پر آواز اُٹھائی۔ علاقہ کے لوگوں کو بلاک نالیوں اور راستوں پر صفائی ستھرائی کے فقدان کی وجہ سے سخت مشکلات کا سامنا ہے۔ بنیادی سہولیات کا فقدان ہے لیکن انتظامیہ نے اِس طرف کوئی توجہ نہ دی۔ انہوں نے بتایاکہ لوگوں کا الزام ہے کہ علاقہ میں جگہ جگہ کوڑا کرکٹ پڑا رہتاہے جس سے ماحول غیر صحت افزا ہے۔شردیش رانا نے بھی اِس موقع پر خطاب کیا اور کہاکہ بجلی کی تاریں کھمبوں کے ساتھ ڈیلی لٹکی ہیں او ر ایک جھال بنا ہوا ہے جس سے مکینوں کو خطرہ لاحق ہے۔ حالیہ دنوں کرنٹ لگنے کی وجہ سے مویشی ہلاک ہوگیا ، اُس کے باوجود محکمہ پی ڈی ڈی نے تاریں تبدیل نہ کیں۔ انہوں نے کہاکہ عوام کی مشکلات کی طرف انتطامیہ کے متعلقہ حکام توجہ نہیں دیتے۔

 

جموں//کلب ہاؤس پر گوجری کلب "عالمی گوجری زبان و ادب " پر گوجری زبان میں مضمون نگاری کے حوالے سے ایک ادبی مجلس کا انعقاد کیا گیا جس میں جموں وکشمیر کے الگ الگ اضلاع سے قلمکاروں اور تحقیق کاروں نے شمولیت کی۔ پروگرام سوشل میڈیا ایپ کلب ہاؤس پر آن لائن منعقد کیا گیا۔ پروگرام کے آغاز میں کلب ممبروقار عاجز بانیاں نے خْطبہ استقبالیہ پیش کیا اور اْس کے بعد صدرِ محفل پروفیسر جہانگیر اصغر کی اجازت سے پروگرام کا باقاعدہ آغاز ہوا۔ معروف براڈکاسٹر عبدل رشید اعوان بطورِ مہمانِ ذی وقار پروگرام میں شامل رہے۔اس گوجری ادبی نشست میں معمول کے مطابق نظامت کے فرائض اشتیاق احمد مصباح  نے اپنے منفرد انداز میں انجام دیے اور  اس نشست  میں جن مضامین نگاروں نے حصہ لیا ان میں شمی ناز صدیقی ، محمد یونس کالوخیل ؛ طارق ابرار چوہدری ؛ چوہدری رفاقت غازی اور رانا ابرار چوہدری شامل تھے۔ صف سامعین میں سے، نکہت چوہدری اور محمد شریف قمر نے پڑھے گئے مقالوں کے متعلق اپنے تاثرات پیش کئے۔ آخر پر ایوان صدارت میں موجود شخصیات نے اپنے تجزیات اور تبصرے کئے اور صدرِ محفل نے مضمون نگاروں و منتظمین کی حوصلہ افزائی کرتے ہوے کہا کے گوجری ادب کو فروغ دینے کے لیے ایسی ادبی مجالس کا انعقاد ہونا لازمی ہے اور سوشل میڈیا کا بہترین استعمال وقت کی اشد ضرورت ہے جس پر ہمارے نوجوان کھرا اتر رہے ہیں۔ اس کے بعد کلب کے منتظم میں سے فیصل رضا بوکڑہ نے شکریہ کی تحریک پیش کی اور پروگرام اختتام ہوا۔

 

ڈوڈہ//ڈائریکٹرسکل ڈیولپمنٹ جے اینڈ کے سدرشن کمار نے ایک میٹنگ میں آئی ٹی آئی ڈوڈہ اور آئی ٹی آئی بھدرواہ میں کئے گئے سول ورکس کی پیش رفت کا جائزہ لیا۔جائزہ میٹنگ میںایگزیکٹیوانجینئر آر اینڈ بی ڈوڈہ،ایگزیکٹیو انجینئر آرا ینڈ بی بھدرواہ ،اے ای ای ڈوڈہ اور انسٹی ٹیوٹ کے دیگر سٹاف ممبران نے شرکت کی۔ انہوں نے متعلقہ عملدرآمد ایجنسیوں کو ہدایت کی کہ وہ کاموں کی جلد تکمیل کے لیے تیزی سے کام کریں۔ ڈائریکٹر نے تعمیراتی سائٹ کا دورہ کرنے پر عملدرآمد ایجنسی کو موقع پر ہدایات دیں۔اس سے پہلے سپرنٹنڈنٹ آئی ٹی آئی ڈوڈہ نے انسٹی ٹیوٹ کے بارے میں ایک تفصیلی پریزینٹیشن ڈائریکٹر سکل ڈیولپمنٹ کو پیش کی۔

 

جموں//دھرمارتھ ٹرسٹ نے اتوار کو رگھوناتھ مندر میں کووڈ 19 ایس او پی پر عمل کرتے ہوئے مذہبی جوش و خروش کے ساتھ شری کرشنا جنم اشتمی منائی۔اس موقع پر ڈویژنل کمشنر جموں ڈاکٹر راگھو لنگر مہمان خصوصی تھے جبکہ جے اینڈ کے ہائی کورٹ کے سینئر ایڈوکیٹ دنیش سنگھ چوہان مہمان خصوصی تھے۔ اجے گنڈوتر ، صدر اور ڈاکٹر گوپال پارتھارتھی شرما ، ٹرسٹ کے سکریٹری بھی موجود تھے۔ جے اینڈ کے دھرمارتھ ٹرسٹ کونسل کی مشاورتی کمیٹی کے ارکان بھی موجود تھے۔رسومات کے مطابق بھگوان رادھا کرشن کے بتوں کو مقدس رگھوناتھ مندر کے حرم سے باہر نکالا گیا تھا اور پرکرما مندر کے احاطے کے اندر کی گئی تھی کیونکہ کورونا وائرس کے پیش نظر شوبھا یاترا منسوخ کردی گئی تھی۔ڈویژنل کمشنر نے ٹرسٹ کے صدر اور دیگر کے ساتھ مندر کے احاطے میں نکالی گئی شوبھا یاترا میں حصہ لیا۔ پجاریوں نے اس مہلک وائرس سے چھٹکارا حاصل کرنے کے لیے خصوصی دعائیں بھی کی اور پوری بنی نوع انسان کی اچھی صحت اور فلاح و بہبود کی خواہش کی۔ اس موقع پر مندر کو رنگ برنگے پھولوں سے سجایا گیا تھا۔ یہ تقریب کل آدھی رات تک بھگوان کرشنا کی پیدائش کے وقت تک جاری رہے گی۔پروگرام کے دوران ڈاکٹر راگھو لنگر اور دنیش سنگھ چوہان کو مندر کے احاطے میں رام دربار میں پوجا کرتے ہوئے نوازا گیا۔

 

جموں// ضلع کشتواڑ سے تعلق رکھنے والے سماجی کارکن نصیر باگوان نے ڈی جی پی اور ایس ایس پی کشتواڑ سے اپیل کی ہے کہ وہ پولیس اہلکار کو میڈل سے نوازے جس نے مبینہ طور پر ایک آوارہ پاگل کتے کو چند روزقبل کشتواڑ میں مارا تھا۔ میڈیا کو دیے گئے ایک بیان میں باگوان نے این جی اوز کی  مذمت کی ہے جنہوں نے جانوروں کے حقوق کی حمایت میں آواز بلند کی۔باگوان نے کہا کہ میں دہلی میں مقیم این جی اوز اور دیگر کی مذمت کرتا ہوں جو اس واقعے سے متعلق اپنی ٹی آر پی بنا رہے ہیں جس کے تحت ضلع کشتواڑ میں ایک آوارہ کتے کو مارنے کے بعد ایک پولیس اہلکار نے کئی انسانی جانیں بچائیں۔ انہوں نے سینئر پولیس حکام سے اپیل کی کہ وہ کشتواڑ میں انسانی جانیں بچانے کے لیے آوارہ کتے کو مارنے والے پولیس اہلکار کی معطلی کا حکم واپس لیں۔

 

اشتیاق ملک

ڈوڈہ //سب انسپکٹر عبدالمجیدنائک کا مختصر علالت کے بعد ہفتے کے روز سرینگر کے ایک ہسپتال میں مختصر علالت کے بعد انتقال ہو گیا۔وہ 57 برس کے تھے۔ ان کا تعلق ڈوڈہ کی تحصیل چلی پنگل کے گاؤں بھٹیاس سے تھا اور آجکل وہ انچارج سی آئی ڈی گندوہ کے عہدے پر فائز تھے۔ ان کا نماز جنازہ اتوار کو اپنے آبائی قبرستان میں الحاج برہان القادر غنی پوری نے پڑھائی جس میں سابق وزیر غلام محمد سروڑی سمیت بھاری تعداد میں لوگوں نے شرکت کی اور پرنم آنکھوں سے سپرد خاک کیا۔ مرحوم علاقہ کے نامور سیاسی کارکن مسرت حسین نیائک، پرویز احمد نیائک ایس ڈی ایم چینہنی، ہارون نائیک اسسٹنٹ ڈائریکٹر و محمد رفیع نیائک جے کے ایس آفیسر کے چچازاد بھائی تھے۔ ان کے قریبی رشتہ داروں کے مطابق پندرہ روز قبل انہیں طبی جانچ کے لیے سرینگر لیا گیا تھا جہاں پر ہفتہ کو انتقال کر گئے۔ ان کی والدہ کا انتقال بھی گذشتہ ہفتے ہی ہوا تھا۔ مرحوم کی وفات پر متعدد سیاسی و سماجی شخصیات نے افسوس کا اظہار کرتے ہوئے غمزدہ خاندان کے ساتھ تعزیت کی ہے۔