عظمیٰ نیوز سروس
سرینگر// پی ڈی پی صدر محبوبہ مفتی نے 13 جولائی 1931 کے شہدا کو شاندار خراج عقیدت پیش کرتے ہوئے ان کی قربانیوں کو جموں و کشمیر کی تاریخ کا ایک اہم باب اور عوام کے حق خودارادیت اور انصاف کی جدوجہد کی لازوال علامت قرار دیا۔ خراج عقیدت پیش کرتے ہوئے محبوبہ مفتی نے کہا کہ ان کی قربانی کشمیر کی اجتماعی یاد کا ایک لازم و ملزوم حصہ ہے اور نسلوں کو انصاف، جمہوریت اور آئینی حقوق کے حصول میں تحریک دیتی رہتی ہے۔
پی ڈی پی صدر نے بی جے پی پر 13 جولائی کے شہدا کی وراثت پر سیاست کرنے کا الزام لگایا اور کہا کہ سیاسی بیانیے یا انتظامی پابندیوں کے ذریعے تاریخ کو دوبارہ نہیں لکھا جا سکتا اور نہ ہی مٹایا جا سکتا ہے۔ انہوں نے تقریبات کے دوران سیاسی رہنمائوں اور پارٹی کارکنوں پر عائد پابندیوں پر گہری تشویش کا اظہار کرتے ہوئے کہا کہ پرامن خراج تحسین کو روکنے سے جمہوری اقدار اور پرامن سیاسی اظہار کے بنیادی حق کو نقصان پہنچتا ہے۔شہدا کو پھولوں کی چادر چڑھاتے ہوئے انہوں نے کہا کہ جموں و کشمیر کے لوگوں کو 13 جولائی 1931 کے شہدا کو خراج عقیدت پیش کرنے سے بار بار روکا جاتا ہے، جنہوں نے آمرانہ طرز حکمرانی کے خلاف جدوجہد میں اپنی جانیں نچھاور کیں، اس سے برسوں قبل ملک کے دیگر حصوں میں بھی اسی طرح کی تحریکوں نے زور پکڑا تھا۔قیادت نے کہا کہ تاریخ کو ممنوعہ احکامات، رکاوٹوں یا پابندیوں سے نہیں مٹایا جا سکتا۔
